“Eis Deputadu Sei Goza Kareta MP 88”

.

Jornal Nacional Diario - Tersa-Feira, 14 Agustu 2012

Mandatu Deputadu II Lejislatura nian remata ona iha 30 Jullu 2012, maibe eis deputadu sira balun sei kontinua goza kareta estadu ho marka MP 88 ne’ebe sira simu.

Kartea marka MP 88 ne’e parlamentu II lejislatura nian sosa ba deputadu 65, maibe iha insisiu distribuisaun kareta deputadu sira husi bancada FRETILIN 21 inklui deputadu ida husi Bancada PUN mak lakohi simu kareta ne’e, tanba tuir sira katak la nesesariu ba deputadu sira atu simu kareta tanba povu sei moris kiak.

Nune’e, deputadu sira ne’ebe mak konsege simu kareta MP 88 ne’e hamutuk 43 kompostu husi deputadu sira Bancada CNRT, PSD, PD, UNDERTIM, KOTA no PPT.

Iha inisiu wainhira deputadu sira simu kareta sira ne’e, Prezidenti Parlamentu sesante La Sama fo sai iha media katak, kareta sira ne’e patrimonia estadu nian no wainhira mandatu II lejislatura remata deputadu sira iha dever moral atu intrega hikas, inklui mos Laptop no patrimonia estadu ne’ebe mak deputadu sira simu, maibe realidade mandatu deputadu II lejislatura remata ona maibe deputadu sira sei uza

hela kareta MP 88.

Relasiona ho kestaun ne’e, Vice Prezidenti parlamentu Nasional (PN), deputadu Aderito Hugo da Costa hateten, Konselu Administrasaun parlamentu sei kria lei ba deputadu sira iha segundu lejislatura ne’ebe sei uza kareta PN nian ho marka 88, tanba tuir loloos kareta ne’e sira intrega ona, labele hodi halai tun sa’e.

.