“Enkontru Alto Nivel Koalia Post UNMIT”

,

Jornal Nacional Diario - Sesta-Feira, 10 Agustu 2012

Mandatu Misaun Integradu Nasoens Unidas (UNMIT) nebe sei remata iha Dezembru mai ne’e, Prezidenti da Republika Taur Matan Ruak, Sesta (10/8) sei konvoka enkontru alto nivel ne’ebe involve mos parte UNMIT nian depois de post UNMIT.

Aliende diskuti mandatu UNMIT nia ne’e, reuniaun alto Nivel ne’e mos koalia konaba vizita Sekretariu Geral Nasoens Unidas, Ban Ki-Moon ne’ebe sei vizita Timor Leste fulan Agustu ne’e.

Enkontru alto nivel sei lidera husi Prezidenti Republika, Taur Matan Ruak, sei partisipa husi Primeiru Ministru xanana Gusmao, Vise Primeiru Ministru Fernando La Sama de Araujo, Prezidenti parlamentu Nasional, Vicente Guterres, Ministru Negosiu Estranjeiru Jose Luis Guterres no Sekretariu Estadu Seguransa Francisco Guterres.

Nune’e mos, Preparasaun ba enkontru alto nivel ne’e, kinta (9/8) Primeiru Ministru Xanana Gusmao hasoru malu ho Prezidenti da Republika, Taur Matan Ruak iha Palacio Presidensial, Aitarak laran, Dili.

Hafoin enkontru, Primeiru Ministru xanana Gusmao dehan, enkontru ho Prezidenti da Republika ne’e atu haree Vindas Sekretariu Jeral ONU ne’ebe mak sei hala’o aktividade barak duran loron rua iha Timor Leste, sei mai iha 15 no fila iha 16 fulan ne’e.

Tuir ajenda ne’ebe JNDiario hetan, iha loron 15 Sekretariu Jeral ho nia delegasaun to’o iha aeroportu Comoro tuku 10:40 Otl, tuir mai deskansa iha Hotel Timor no kontinua enkontru ho Senor manajementu UNMIT iha Hotel Timor, depois ne’e ba hasoru ho Prezidenti da Republika, Taur Matan Ruak.

Ban Ki-Moon mos sei partisipa hodi loke exibisaun fotografia UNMIT iha Museu resistensia, kontinua sorumutu ho parlamentu Nasional ho diskursu, atende mos akrdu New Deal frajilimentu asistementu ba servisu hamutuk, no sei hala’o palestra iha UNTL konaba edukasaun diak ba konstrusaun estadu, sei vizita mos eskola distritu Liquisa, kasait, halao intervista ho RTTL-EP, depois fila no husik hela Timor Leste.

.