Estrutura V Governu Konstitusional: “CNRT Rekoinese Fo Karta Ba FRETILIN”

.

Jornal Nasional Diario - Sesta-Feira, 03 Agustu 2012

Sekretariu Jeral Partidu Consellu Nasional Rekonstrusaun de Timor (CNRT) Deonisio Babo rekoinese Partidu CNRT haruka karta ba lideransa Partidu Frente Revolusionariu Timor-Leste Independente (FRETILIN), maibe la’os atu partisipa iha membru Governu.

Sekretariu Jeral esplika, kontiudu karta ne’e atu bolu Prezidenti no Sekretariu Jeral Partidu FRETILIN hodi tuir inkontru nivel lideransa nasaun nian atu haree ba asuntu povu nian, dezenvolvimentu no prespara jerasaun foun ba futuru.

“Iha komunikasaun liu husi karta, maibe intensaun atu halo enkontru entre Prezidenti ho Sekretariu Jeral FRETILIN hamutuk ho Prezidenti CNRT hanesan lider nasaun nian atu hare’e ba asuntu povu nia moris, dezenvolvimentu em jeral, haree ba preparasaun jerasaun foun iha futuru, maibe ne’e limiti (terbatas) deit ba entre sira laos partidu tomak hotu,” esplika Deonisio Babo ba JNDiario, kinta (02/8) iha PN.

Nia hatutan, koligasaun hataan ba planu ne’e, maibe sei haree ba preparasaun terseiru lejislatura nian, hotu tiha ba mak foin hanoin oinsa atu koalia ida ne’e i dala ida tan klarifika karta ne’e lideransa partidu sira mak komunika ba malu.

Tantu hatan konaba kontiudu karta ne’ebe ho intensaun atu bolu lideransa partidu FRETILIN tama iha Governu, Deonisio afirma katak, CNRT seidauk haruka karta ba FRETILIN ho kontiudu partisipa iha Governu, nune’e Partidu FRETILIN mos nunka husu atu sira nia ema partisipa iha Governu.

“Hau hatene diak katak, iha intensaun diak entre Prezidenti no Sekretariu Jeral FRETILIN atu koalia ho Prezidenti CNRT kona ba asuntus nasional iha nia kontestu luan tebes, ne’ebe sira bolu abrazensia politika ne’ebe luan, maibe sira nunka husu atu tama iha Governu,” afrima nia.

Sekretariu Jeral ne’e hatutan, CNRT agora hamutuk ona ho bloku koligasaun nune’e kuandu desizaun ne’ebe deit mak sai tenki konsulta ho bloku ne’e.

.