“Indonesia Impede Konstrusaun Edifisiu Alfandega TL”

.

Jornal Nasional Diario - Sesta-Feira, 03 Agustu 2012

Ministru Negosiu Estranjeirus (MNE), kinta (2/8) horseik ba hasoru malu ho Prezidenti da Republika, Taur Matan Ruak hodi informa problema kona ba parte Indonesia ne’ebe impede konstrusaun edifisiu Alfandega Timor-Leste nian iha Sub Distritu Pasabe, Distritu Oecusse.

Entertantu, Konstrusaun edifisiu Alfandega Timor-Leste tuir loloos hahu iha semana kotuk liu ba ne’e, maibe la konsege halo tanba hetan impedementu husi Nasaun Vizinho Indonesia.

“Seidauk bele hahu tamba se ita kontinua konstrusaun sei bele rejulta problema ladiak ba ita nia komunidade iha ne’eba,” haktuir Direktur asuntus bilateral i consular interinu MNE, Crisogno de Araujo informa asuntu ne’e ba Jornalista sira hafoin hasoru malu ho Xefe Estadu Taur Matan Ruak ne’ebe akompania mos MNE Zacarias Albano, kinta (02/8).

Nune’e mos nia informa, MNE tun ona diretamente hodi haree problema refere, entertantu iha tempu badak nia laran Governu Timor-Leste sei tur hamutuk ho parte tekniku husi Indonesia nian hodi buka solusaun ba kestaun ne’e.

Nia informa mos katak, kestaun ne’e hato’o ona ba Primeiru Ministru Xanana Gusmao no PM fo instrusaun atu hapara obra refere no halo lai diskusaun no negosiasaun parte Indonesia ninian.

.