Jornalista Hetan Sona Husi Ema Deskoñesidu

.

TEMPO SEMANAL - August 10th, 2012

Jornalista Radio Rakambia tenke hala’o prosesu operasaun iha Hospital Nasional Guidu Valedares (HNGV). Tanba, hetan kanek grave iha parte kabun.

Loron sesta feira (10/8) madrugada iha área tasi ibun Faról besik edifísiu KAK, Leonitu Gonçalves ne’ebé durante ne’e, hala’o knaar nu’udar Jornalista Radio Rakambia hetan sona husi grupu deskoñesidu.

Tuir informasaun husi parte HNGV, aleinde Leonitu iha mós joven na’in rua mak hetan sona husi grupu deskoñesidu iha loron ne’ebé hanesan. Joven hira ne’e mak hanesan, Godinho Gonçalves ho idade 25 hela iha Ai-tarak laran no Clementino ho idade 20 hela iha Delta 3.

Xefe departamentu emerjénsia, Américo dos Santos hateten, vítima na’in tolu ne’e, hetan ona tratamentu módiku no vítima Godinho Gonçalves parte hospital haruka fila ba uma tanba hetan kanek kaman.

“Clementino ho Leonitu too agora sei iha hela hospital hodi hetan tratamentu médiku ne’ebé másimu tanba kanek ne’ebé sira afeta greve. Ha’u la hatene sira nia kanek ne’e, suku pontu hira. Tanba, doutór sira ne’ebé hala’o operasaun mak hatene.” dehan Xefe departamentu emerjénsia ba Online Tempo Semanál

Nune’e mós Diretór Radio Rakambia Eurico Pereira hateten, Leonitu jornalista husi Radio Rakambia hanesan reporter no presenter servisu kleur ona iha Radio Rakambia. Hahu horikalan hala’o servisu tama programa ohin dadeer saan.

Iha tuku lima ho balun nia koko atu hala’o ejarsisiu uitoan too iha área Faról besik edifísiu KAK nian oin hetan sona husi ema ne’ebé deskoñesidu husi parte nia kabun no agora daudauk nia iha hela Hospital Nasionaliza Guidu Valederes iha sala operasaun hodi hala’o tratamentu iha ne’ebá.

“Ami la hatene motivu saida mak reporter hetan asidente ida ne’e, too agora ha’u hanesan lideransa organizasaun sidauk hatene klaru kona ba kazu ne’e. Ne’e duni, ami integra ba polisia hodi hala’o investigasaun atu nune’e bele hetan autór ne’ebé ke hala’o violénsia hasoru jornalista Leonitu Gonçalves.” dehan Eurico

Aleinde ne’e, Alberto Carvalho Pereira nu’udar família husi vítima (Leonito) informa katak, kazu refere vítima rasik hato’o ona informasaun ba iha Polisia investigasaun. (**)

.