“Prosesu Rekrutamentu Funsionariu Publiku La Justu”

.

Jornal Timor Post - Tersa-Feira, 14 Agustu 2012

Deputadu Virgilho Hornai (PD), deklara sistema administrasaun Governu sei la lao diak wainhira la tau matan ba prosesu rekrutamentu funsionariu publiku ne’ebe la justu no laiha balansu.

“Hau haree prosesu rekrutamentu ba funsionariu sira, la justu, funsionariu ne’ebe serviso dezde 2001, sira nia estatutu sai ona funsionariu prmanente, sir abele S1, S2 sei sei mantein nafatin ho level III, IV, V, enkuantu ho nivel eduksaun SMA, Universidade seidauk remata foin tama bele konkore ba iha level VI,” dehan Hornai iha uma fukun PN liu husi sesaun plenaria Segunda (13/8).

Hornai mos afirma, hahalok hanesan ne’e hamosu problema boot ba makina administrasaun Governu wainhira la tau atensaun.

Alende ne’e, nia hatutan, funsionariu ne’ebe fo ona sira nia dedikasaun durante tinan lima ba leten, Governu iha obrigasaun tenki halo promosaun ba sira nia kareira, husi parte seluk nia mos kestiaona ho viaturas (Kompra kareta estadu) ne’ebe tinan-tinan sempre aumenta.

“Kompras ba kareta estadu tinan-tinan barak tebes, tanba ne’e, parlamentu ida ne’e presija bolu atensaun ba governu, katak uja viatura ne’e tenki ho responsablidade, tanba ita aprova osan governu ba kompra kareta depois la kleur hetan astragus, mos funsionariu balun simu kareta laiha responsablidade, ida ne’e hau hanoin presija atensaun,” dehan Hornai.

.