Eviksaun Ba Komunidade: “La Sama: Labele Espera Governu Halo Mahon”

.

Jornal Timor Post - Kuarta-feira, 03 Outubru 2012 

Vice Primeiru Ministru Fernando La Sama de Araujo hateten, prosesu eviksaun ne’ebe Tribunal halo ba sidadaun ne’ebe laiha diretu atu hela rai ne’ebe okupa, labele espera katak, Governu sei halo mahon ba ema hotu. 

La Sama hato’o kestaun ne’e, relasiona ho prosesu eviksaun ne’ebe Tribunal Distrital Dili disidi, hodi hasai obrigatoriu familia uma kain lima iha parte Suku Kampung Alor, Kinta semana kotuk. 

 “Hau hanoin se Tribunal foti desizaun katak, ne’e la’os hau nia diretu, ne’e katak iha ne’ebe ne’e la’os sira nia diretu, labele espera katak, governu sei halo mahon ba ema hotu, ema ida-idak tenki hakaas an hodi buka mahon ba nia an rasik,” La sama Informa ba Timor Post, Tersa (02/10), hafoin vizita servisu fatin Ministeriu Turizmu Iha memorial Hall, Farol, Dili. 

Vice Primeiru Ministru ne’e haktuir, kuandu iha situasaun esxtra-ordinariu ruma governu ho estadu iha responsablidade, maibe koalia sobre desizaun Tribunal hatudu liu ona prosesu, ne’e Tribunal mak sei desidi, tanba ne’e, ema ne’ebe okupa ema seluk nia sasan ka propriedade estadu nian tenki foti desizaun mesak, hanesan sai husi fatin refere no desizaun lakon ho manan. 

 Tuir nia, desizaun Tribunal nuudar desizaun ne’ebe aas liu ona iha nasaun demokratiku, tanba Tribunal nunka foti desizaun arbiru, maibe atu tesi lia ruma bazeia ba konsiderasoens barak. 

 Nune’e, nua husu ba sidadaun hotu inklui nia (Vice PM), Primeiru Ministru, no Prezidenti Republika tenki kumri desizaun Tribuna.

.