“Deputadu Labele Sulan Prado Iha Uma”

.

Jornal Timor Post - Kinta - Feira, 17 Janeiru 2013 

Ho aumenta tan viaturas foun ba deputadus sira iha Parlamentu Nasional, Organizasaun Naun Govermental Luta Hamutuk (LH) husu atu deputadu sira labele simu tiha viaturas depois hodi ba sulan deit iha uma no hein simu deit SMS maibe tenki tun duni ba baze hodi hatene povu nia susar no terus. 

 “Ita kuandu kontenti liu kuandu deputadu sira nia prado para bei-beik iha Suku sira, entaun ita bele hatene sira tun duni ba haree realidade iha baze, maibe se deputadu sira simu tiha para de’it iha uma depois mai PN mak simu de’it SMS konserteza governu la rona,” dehan Diretor ONG Luta Hamutuk, Mericio Akara iha Farol, Dili (16/01). 

 Nia hateten, se karik nia mak tur iha governu nia mos lakohi rona ema ida mak mai ho buatus liu SMS, tanba tuir Diretor ne’e katak, sistema governu nian hakarak rona duni ema ne’ebe mak diretamente hatene realidade ne’ebe mak mosu iha rai laran. 

Tanba ne’e, se deputadu mak sai baruk ten, depois simu tan prado foun, oinsa atu sai povu nia liman ain?, ne’e duni tuir Akara, diak liu lalika fo sala deit ba governu. 

Entertantu, iha tersa feira (14/01) foin lalais ne’e iha Uma Fukun PN, halo ona serimonia entrega xave viatura hamutuk 65 ba deputadu sira, iha oportunidade ne’eba Presidenti parlamentu Nasional Vicente Guterres mos husu atu deputadu sira tenki utiliza didiak viaturas hirak ne’e.

.