“Taur Husu Tebe Sai Funsionariu Barukten, Rai La Naben”

,

Jornal Timor Post - Sesta - Feira, 18 Janeiru 2013 

Relasiona ho Funsionariu servisu Apoiu Medikamentu Saude (SAMES) ne’ebe sempre hala’o Greve hasoru Governu hodi ejiji sira nia direitu, Prezidenti Republika, Taur Matan Ruak hateten, lakohi servisu ona hakarak ezizi deit duni sai tiha rai la naben ida. 

 “Funsionariu ne’ebe mak servisu baruk, ezemplu hanesan SAMES agora ejiji sira nia direitu salariu maka’as los halo greve, depois lori Ai-moruk ba fakar iha Tasi-Tolu hodi sunu, hau hateten ba Primeiru Ministru duni tiha sira,” hateten Taur Matan Ruak iha Centru Convensoens Dili, Merkadu Lama (17/01). 

Taur hateten, durante funu iha ailaran sira konsege duni soldadu 650 maibe rai la naben, tanba ne’e agora labele halimar ho funsionariu ne’ebe barukten tanba, se ema hotu barukten Timor sei la la’o ba oin. Xefi Estadu hateten tan, Estadu labele haree fali ba ema individual na’in ida ou rua nia interese, maibe estadu hamrik atu servi ba interese povu tomak. 

 Tuir nia, iha ema barak mak oras ne’e la servisu, balun iha familia ida iha ema barak maibe ida deit mak servisu hodi fah an ema hotu ne’ebe mak hela familia ida nia laran, maibe funsionariu publiku sira hakarak eziji de’it direitu maibe la haree ba servisu saida mak sira hatudu ona. 

 Ba funsionariu SAMES greve laos foin dala ida maibe desde husi tinan hirak liu ba kotuk sempre eziji direitu, wainhira la resposta husi governu taka distribuisaun aimoruk ba povu sira ne’ebe mak presija asistensia saude. 

 Ho hahalok ida ne’e foin lalais, Xefi Governu Kay Rala Xanana Gusmao hamutuk ho membru governu sira lori aimoruk ba iha Tibar soe foer fatin hodi sunu, atu ida ne’e la akontese tan Xefi estadu husu ba funsionariu publiku para konsiente saida mak konkista ona husi servisu ne’ebe mak durante ne’e hetan ona. 

.