“Deskonfia Kilat PNTL Lakon Iha Fatin Protistuisaun”

.

Jornal Independente - Sesta-Feira, 10 Agustu 2012

Deskonfia kilat Polisia Nasional Timor Leste (PNTL) ida lakon iha fatin protistuisaun, iha loron 30 Jullu 2012.

Fatin protistuisaun ne’e iha dirasaun pantai kelapa, Dili, ne’ebe eziste nuudar restaurante ida maibe halo mos atividade illegal.

Tuir fontes kredivel husi instituisaun PNTL ba INDEPENDENTE horsehik katak, kilat ho tipu FNC ne’e lakon bainhira komandante PNTL ida halo vizita ba fatin protistuisaun, fontes ne’e mos seidauk bele hateten klaru objetivu husi vizita ne’e, tanba rajaun, investigasaun profundu seidauk deklara.

Iha fatin ketak, Sekretariu Estadu Seguransa Francisco Guterres rekoinese kilat PNTL ida lakon duni, nia parte husu ona ba komando jeral PNTL hodi suspende kedas autor alakon kilat ne’e, atu bele tuir prosesu investigasaun.

Guterres mos simu tiha ona relatoriu horsehik, maibe nia rasik seidauk lee, tanba ne’e, nia husu ba populasaun sira labele paniku, no kontinua hakmatek hodi hala’o hanesan aktividade bai-bain.

Nia mos promete katak, sei foti fali kilat ne’ebe lakon liu husi prosesu investigasaun ne’ebe halao ona.

.