“FRETILIN Konsidera PN Lakon Kredibilidade”

.

Jornal Independente - Sesta-Feira, 10 Agustu 2012

Bankada FRETILIN iha uma fukun Parlamentu Nasional konsidera terseira lejislatura lakon nia kredibilidade, tanba laiha servisu ne’ebe efetivu.

Hafoin deputadu foun sira simu pose iha semana kotuk, to’o agora parlamentu Nasional seidauk hala’o sesaun plenaria ruma hodi deskute no atende lei balun ne’ebe konsidera importante.

Vice Prezidenti Bancada FRETILIN iha PN Deputadu Francisco Branco hateten, terseira lejislatura lakon nia kredibilidade, tanba loloos PN halo ona sesaun plenaria ruma.

Nia hatutan, hafoin tomada de posse husi deputadu foun, iha oras 24 hodi hili Presidenti PN ho nia estrutura tomak, tuir kedas ajenda importante hodi deskute iha plenaria.

“Kestaun mak kredibilidade uma fukun ne’e, ema barak la dun fiar ona, presiza tebes lejislatura ne’e rekopera fila-fali kredibilidade uma fukun ida ne’e,” deklara Branco, iha uma fukun PN (9/8).

Deputadu FRETILIN ne’e mos hatutan tan katak, uma fukun povu nian ne’e atu iha kredibilidade diak bainhira hahu tomada de posse, lao tuir ona regra rejimentu no esperitu demokratiku.

Entertantu, Sekretariu Meza PN, Maria fernanda Lay hateten, oras ne’e dadaun, Prezidenti PN ho reprezetante Bancada tomak diskute hela estabelesementu komisaun espesializasauntamba ne’e mak plenaria seidauk bele hahu.

.