Dionisio Babo: “Hili Membru Governu Kompetensia Xanana”

.

Jornal Nasional Diario - Sesta-Feira, 03 Agustu 2012

Partido koligasaun CNRT, PD no Frenti-Mundanca konkorda hamutuk ona hodi fo kompetensia tomak ba Primeiru Ministru indizitadu, Xanana Gusmao atu hili membru do Governu ba tur iha V Governu Konstitusional mai ne’e.

Sekretariu Jeral Partidu CNRT, Dionisio Babo hateten lia hirak ne’e ba Jornalista sira, iha Palacio Governu, Kinta (2/8), bainhira husu kona ba formasaun V Governu konstitusional.

Tuir Dinisio Babo katak, oras ne’e dadauk PM indizitadu Xanana Gusmao monta hela ona individu ne’ebe mak atu sai membru Governu, tanba ne’e membru Governu ne’ebe sei mai, Partidu koligasaun sei fo sai iha tempo badak nia laran.

“Primeiru Ministru indizita maka iha direitu atu fihir membru governu hira mak sei servisu hamutuk ho nia,” Sublinha Babo.

Ba Partidu CNRT rasik, Dionisio dehan, laiha rekomendasaun especial maibe importante maka ema ne’ebe hetan fiar bele servisu hamutuk ho PM Xanana Gusmao.

Dionisio Babo fo estimasaun katak, talves iha loron (6/8) oin bele anunsia ona membru Governu nia naran ba publiku hafoin bele tama ba tomada de posse iha Kuarta (8/8).

Kompozisaun estrutura organika V Governu konstitusional hamutuk 55, komesa husi Primeiru Ministru, Vice Primeiru Ministru, Presidenti Konsellu Ministru, Ministru, Vice Ministru no Sekretariu Estadu.

.