“FRETILIN Lakohi Tomas Cabral Tama Estrutura Governu”

.

Jornal Independente - Sesta-Feira, 10 Agustu 2012

Partidu FRETILIN kestiaona maka’as Diretor Sekretariadu Tekniku Administrasaun Eleitoral (STAE), Tomas Cabral, iha estrutura kintu Governu Konstitusional, envolvimentu ne’e, konsidera eleisaun Jeral foin lalais ne’e la imparsial.

Deputadu Bancada FRETILIN, Inacio Moreira hateten, envolvimentu Diretor jeral STAE iha membru governu hatudu katak, durante ne’e STAE laiha imparsialidade tuir lei haruka.

“Diretur STAE husi partidu CNRT ne’ebe sai sekretariu Estadu iha kintu Governu ne’e,” dehan nia iha uma fukun PN (9/8).

Nia la fiar katak, Tomas Cabral ema independente, durante sei kaer pasta hanesan Diretor STAE, tanba se nia ema independenti duni, nia labele adere ba partidu politiku ruma ou nia Tomas rejeita tama iha strutura membru Governu ruma.

Haree ba laiha imparsialidade no independensia servisu STAE nian, oras ne’e dadaun partidu FRETILIN haruka ona keiza lubuk ida ba Tribunal Rekursu.

Nune’e FRETILIN mos sei halo anunsia ba publiku kona ba pozisaun Diretor Jeral STAE durante eleisaun bainhira governu foun ne’e simu on pose.

Ba kestaun ne’e, Xefe Bancada CNRT, Deputadu natalino dos santos hateten, desizaun nomeia Diretor STAE ba Sekretariu Estadu ne’e, kompetensia Primeiru Ministru indijitadu xanana Gusmao, ne’ebe fihir Timor oan ne’ebe iha kapasidade hodi sai membru governu.

.