“Konflitu Entre Francisco Ho Longuinhos”

.

Jornal Timor Post - Tersa-Feira, 14 Agustu 2012

Konsekuensia husi konflitu entre Sekretariu Estadu Segudarnsa (SES), Francisco Guterres ho komandante PNTL, Longuinhos Monteiro, maka to’o ikus sosa kilat la liu husi estudu Viavilidade.

Maske la temi konflitu privadu ka institusional entre lider instituisaun rua ne’e, maibe hatudu momoos husi kilat hamutuk 65 foin lalais hola iha Indonesia sein estudu viabilidade, ne’e katak lider nain rua ne’e iha konflitu no laiha koordenasaun ne’ebe diak.

“Sira (SES ho PNTL) hanesan hadau malu hodi sosa binkeru ba sira,” afirma membru Board Fundasaun mahein (FM), Jose Luis Oliveira liu husi konferensia imprensa, Segunda (13/8), iha edifisiu FM.

Jose hateten, autoridade sira ne’e la tau konsiderasaun katak, kilat ne’e buat ida sensitive, buat ida ne’ebe tenki trata ho didiak.

Nia mos fo izemplu, hanesan kazu akijasaun sosa Land Ship ou Roo Kiik ba Polisia Maritima, kazu akijasaun ba sosa kareta ba komando PNTL, mos iha konflitu entre lideransa nain rua ne’e.

Pior liu tan, Jose dehan, mekanismu sosa kilat ne’e laiha legalidade husi orgaun Estadu, liliu hetan aprovasaun husi parlamentu Nasional.

“Atu sosa kilat tenki liu husi estudu viabilidade ida, ezemplu, ita presiza hira, nesesidade tuir duni nivel ameasa ka lae,” hatutan Jose.

Nune’e mos, Joao Almeida koordenador peskiza FM hateten, nia parte lamenta ho deklarasaun husi Sekretariu Estadu Seguransa ne’ebe lakohi atu responsabliza ba problema sosa kilat maibe dun malu fali.

Ba kestaun ne’e, Jose rekomenda ba governu atu estabelese Armazen (Paiol) ida iha Timor-Leste, rekoilla fali kilat iha postu Polisia ne’ebe seidauk iha armazen, halo publikasaun ida kona ba kilat hira mak lakon no hira mak iha PNTL nia liman.

.