“PM Xanana Rekonese Ministru AMP Barak Failla”

.

Jornal Independente - Sesta-Feira, 03 Agustu 2012

Primeiru Ministru Xanana Gusmao Rekoinese Governu Aliansa Maioria Parlamentar (AMP) ne’ebe nia lidera iha Ministeriu barak faille.

Maski Ministeriu anterior barak failla, nia kontinua lidera kintu governu kontitusional haodi hadia atu labele repete faillansu ne’ebe halakon tiha ona estadu.

PM Xanana koalia ida ne’e bainhira halo inkontru oh Diretur nasional sira hodi koalia konaba estrutura foun ba kintu Governu konstitusional, iha sede CNE Kaikoli Dili.

Xanana esplika, Ministru barak faille, tanba halo projeitu barak maibe hikus mai abandona de’it.

Realidade xanana dehan, mini merkadu barak ne’ebe konstrui iha tinan lima ba kotuk la utiliza ho diak maibe animal hanesan bibi, fahi mak uza fali.

“Balun halo merkadu sai bibi nia fatin, bibi-ten mak nakonu, ida ne’e labele akontese tan,” dehan PM Xanana (1/8).

Xanana mos lakohi iha governu foun, Ministeriu sira ne’ebe hakarak halo planu ba projeitu ruma tenki iha estudu ida klean.

“Ministeriu balun halo tiha uma, bee laiha, saneamentu laiha, hau lakohi ida ne’e akontese tan,” dehan PM.

Ministeriu iha kintu Governu konstitusional, PM Xanana dehan, labele kria tan divida barbarak hanesan akontese ona iha anterior.

“Hau lakohi divida akontese tan iha oin mai, hau la tolera tan,” dehan Xanana.

Iha inkontru ne’e, PM Xanana halo ajustamentu ba estrutura governu anterior neebe iha mudansa tanba iha Ministeriu balun taka.

.