Primeira Plenaria PN: “Deputadu Balun Tur Nonok To’o Plenaria Remata”

.

Jornal Nacional Diario - Tersa-Feira, 14 Agustu 2012

Parlamentu Nasional iha terseira lejistura foin primeira vez halo plenaria iha segunda (13/8) hodi debate kona ba hari’i komisaun, maibe antes atu debate deputadu sira foti uluk problema real ne’ebe povu hasoru iha baze.

Observasaun Jornal Nacional Diario iha plenaria ne’e nota katak, durante sesaun plenaria la’o namanas, depuadu balun husi bloku koligasaun la koalia ka nonok hodi tur rona deit to’o plenaria remata, i ironi liu mak iha momentu importante hanesan ne’e, deputadu husi Bloku koligasaun nian balun kadeira mamuk tamba la tama hodi tuir plenaria.

Ba kestaun ne’e, Deputadu husi Bancada FRETILIN, Inacio Moreira husu ba deputadu hotu tenki hala’o duni nia knaar hanesan reprejetante povu i ba deputadu ne’ebe la tama tenki halo justifikasaun, labele halimar demais ho povu nia vida.

Kona ba, deputadu ne’ebe la ativu iha diskusaun, Vice Prezidenti PN Aderito Hugo da Costa hateten, sira ne’ebe tuur iha ne’e sei hato’o aspirasaun povu nian, tanba sira mai reprezetante povu la’os sira nia interese rasik.

.