Governu Faila Ba Programa Saude: “Parteira Uza Lilin Hodi Atende Pasiente”

.

Notisia Husi TVTL - Tersa-Kalan, 02 Outubru 2012 

 Portu Saude Labubu, Ilimanu no Oho-rai ne’ebe lokaliza iha Zona Remotas Sub Distritus Laklo, Distritu manatutu hasoru problema falta bee moos no eletrisidade. 

 Iha sesta-feira semana kotuk Jornalista TVTL explora situasaun no kondisaun riil iha Postu Saude hirak ne’e. Banku Mundial nuudar parseiru no Ministeriu saude hala’o vizita ba sub Distritu Laklo hodi haree besik kondisaun real husi postu saude iha Sub Distritu ne’e atu bele identifika problema ne’ebe pesoal saude sira infrenta ho atividade loro-loron hodi halo tratamentu ba pasiente sira. 

Durante vizita, sira mos hala’o reuniaun ho komunidade iha fatin refere tamba postu saude iha fatin nee la hetan eletrisidade no bee moos, durante halo tratamentu ba pasiente sira uza de’it lilin hodi atende pasiente sira. 

Iha postu saude Labubu mos hasoru problema falta bee moos no laiha asesu ba eletrisidade, kondisaun ne’e difikulta atendementu orjenti iha tempu kalan, tamba ne’e, lilin sai nuudar fasilidade uniku hodi atende pasiente. 

 “Iha ne’e eletrisidade laiha, ami uza lilin deit hodi atende pasiente, osamentu sosa lilin mos ami uza ami nia privadu,” dehan Parteira ne’ebe hala’o knaar iha fatin refere. 

Pesoais saude sira husu ba Ministeriu ne’ebe kompotente atu rejolve problemas hirak ne’e, atu sir abele fasilita atendementu ba pasiente sira.

.