“Halakon Kilat Tenke Tama Kadeia”

.

Jornal Timor Post - Tersa-feira, 02 Outubru 2012 

Membru Parlamentu Nasional husi bancada FRETILIN, David Dias Ximenes “Mandate” kondena oknum Polisia ne’ebe foin dadauk halakon kilat tenki sulan iha kadeia militar para hein prosesu investigasaun, tamba halakon arma militar ne’e krimi.

 “Uluk iha ami nia tempu, material de gerra ida lakon, laos komando halo suspensaun deit maibe tenke sulan uluk iha kadeia militar, foin prosesu investigasaun lao,” dehan Mandate ba Timor Post iha PN, relasiona ho membru PNTL ne’ebe halakon kilat seidauk suspende to’o agora. Mandate haktuir, lolos oknum PNTL ne’e tenki sulan iha kadeia militar tanb ania atetude pesoal nuudar ema seguransa hodi defende nasaun ne’e la diak. 

 Nune’e, Mandate mos husu ba komando PNTL tenke investiga, se mak fo autorizasaun ba oknum Polisia ne’e lori kilat sai, momentu nee iha estadu emerjensia ruma ka, nusa mak oknum ne’e lori kilat tuna sae iha Dili laran hanesan Texas, nebee lolos ne’e labele. 

 Entertantu, tuir informasaun ne’ebe diariu ne’e asesu husi fonte konfirmadu katak, oras ne’e dadaun oknum PNTL ne’ebe foin dadaun halakon kilat seidauk suspende husi komando PNTL, oknum ne’e mos buka meus atu kondena ema seluk para nia atu salva an. 

.