“Distinu Mandatu Longuinhos Seidauk Klaru”

.

Jornal Timor Post - Sesta - Feira, 18 Janeiru 2013 

Governu seidauk bele disidi distinu mandatu komandante Jeral Polisia Nasional Timor Leste (PNTL), Komisariu, Longuinhos Monteiro, maske nia mandatu hela deit ona fulan tolu. 

 Sekretariu Estadu Seguransa (SES), Francisco Guterres hateten, agora dadaun governu seidauk bele koalia kona-ba mandatu komandante Jeral PNTL ninian, tamba seidauk tempu atu koalia. 

“Hanesan membru governu ne’ebe tutela ba PNTL, hau seidauk bele komenta ida ne’e, iha tempu oportunutu ami sei fo hatene imi, se mak Governu eskolla sai Komandante Jeral,” dehan SES, Francisco Guterres, ba Jornalista sira iha Sentru Convensaun Dili (CCD), kinta (17/01). 

Francisco Guterres konfesa to’o agora governu seidauk iha desizaun ne’ebe klaru, tanba nia lakohi halo espekulasaun hodi hamosu polimika. 

 “Agora ita labele halo espekulasaun para kria fali problema iha PNTL nia laran,” tenik Sekretariu Estadu ne’e. Governu iha hanoin ona atu foti komandante Jeral ba Instituisaun PNTL, maibe seidauk determina, se los maka atu ba tu’ur iha fatin ne’eba. 

Tanba ne’e, nia husu ba publiku atu hein to’o tempu sira sei fo sai ba publiku hodi hatene se mak atu sai komandante Jeral PNTL. 

.