“TMR Preokupa Estrada Ohin Hadi’a, Aban Ku’ak”

,

Jornal Independente - Sesta - Feira, 18 Janeiru 2013 

Prezidenti Republika Taur Matan Ruak preokupa tebes kualidade projeitu estrada sira iha teritoriu ne’ebe mak halo ladun iha kualidade hodi fo impaktu ba kondisaun estrada sira iha rai laran ne’ebe grave tebes. 

“Ita nia estadu ita nia infraestrutura nia kondisaun la diak,” dehan Prezidenti Repblika bainhira hato’o nia deskursu iha inkontru nasional ne’ebe organiza husi KFP iha Centro Convensaun Dili (CCD). Ezemplu, Xefe Estadu dehan, reabilitasaun estrada ne’ebe husi Bidau ba Metiaut foin reabilita fulan hat deit a’at fali ona. 

“Estrada neebe liga ba hau nia uma ida edifisiu Cruz Vermeilha nia oin iha fulan Outubro mak halo reabilitasaun, agora ke’e fila fali de’it, halo tia ida palan hau iha setrada klaran, tanba deit ita nia hahalok sira ne’e,” dehan Taur Matan Ruak. 

Iha Distritu Ermera, Taur dehan, governu hadia estrada kilometru 12 husi sub Distritu letefoho ba Sub Distritu Atabae ho alkatraun maibe estrada ligasaun husi Dili ba Distritu ermera rasik kondisaun aat liu. “Estrada husi Dili ba Gleno, ba Letefoho estrada hanesan debu, ne’e problema ba ita,” dehan Prezidenti Republika Taur Matan Ruak. 

Xefe estado mos kestiaona, orsamentu jeral estado 2012 governu la konsege gasta osan mileons U$400 nusa mak la hadia estrada ne’ebe mak seidauk diak. “Orsamentu 2012 Carry Over 400 milloens resin, se ita halo estrada kada kilometru 1 milaun de dollars, iha 400 estradas mak ita husik hela,” dehan Prezidenti TMR. 

Aleinde estrada, Xefe Estadu mos preokupa Ambulansia ba Ospital no Klinika sira ne’ebe la sufisiente hodi atende ema moras. Realidade, Taur dehan, nia ba iha Distritu Ermera iha klinika ida neebe mak tula ema moras ho motor tanba kareta ambulansia ida deit.

 “Ema presiza kareta laiha, maibe imi (servidor estadu) tula imi nia feen no oan la’o tuun sa’e,” dehan Taur. 

.