“Longuinhos Monteiro La Kohi Fo Komentariu Prezensa Hercules Iha TL”

.

Jornal Timor Post - Kuarta-Feira, 16 Janeiru 2013 

Kestaun Informasaun Hercules neebe oras ne’e dadaun sai polimika iha notisia internasional no nasionais, tuir Komandante jeral Polisia Nasional Timor Leste (PNTL), Komisariu Longuinhos Monteiro desidi lakohi fo komentariu ba sidadaun Indonesia ho naran Hercules ne’ebe halo vizita mai Timor Leste ho Pistola. 

 Longuinhos dehan tan katak, nu’udar komandante PNTL nia parte sei lakohi koalia kona ba kestaun sira ne’ebe laiha relasaun ho PNTL. “Hercules ne’e hau nia saida mak hau atu komenta fali ida ne’e, hau la komenta kestoens sira hanesan ne’e mai,” dehan Longuinhos ba Jornalista sira iha Akademia PNTL, Comoro, Tersa (15/01). 

Tuir informasaun ne’ebe diariu ne’e asesu katak, Hercules ne’ebe mai to’o iha Timor Leste hetan seguransa masimu husi Polisia Nasional Timor Leste, hafoin tun iha Aeroportu Internasional Prezidenti Nicolao Lobato. 

Iha mos informasaun ne’ebe espailla iha publiku katak, Hercules ne’ebe mai halo vizita TL ho arma hanesan pistola, maibe parte seguransa iha TL la prende sasan ne’ebe lori tama iha TL. 

.