“PN Lakoi Maijen Lere Husu Deskulpa Ba Hercules”

.

Jornal Independente - Kuarta - Feira, 16 Janeiru 2013 

Parlamentu Nasional (PN) la konkorda maijor Jeneral FALINTIL-Forsa Defesa Timor Leste (F-FDTL) Lere Anan Timur atu husu deskulpa ba sidadaun bai-bain husi Republika Indoenzia Hercules. 

Komandante F-FDTL Lere, antes ne’e deklara sei kaptura Timor oan Hercules ne’ebe oras ne’e sai ona sidadaun Indonesia bainhira sei kontinua halao tan vizita mai Timor-Leste iha futuru. Maibe deklarasaun ne’e hamosu polimika boot iha Indonezia, Dewan Pimpinan Pusat gerakan Rajyat Indonesia Baru (GRIB) triste tebes ba ameasa husi maijor Jeneral Lere Anan Timur ba Xefe GRIB Rosalia Marshal (Hercules). 

“Hanesan komandante Militar iha nasaun Demokratika Timor-Leste loloos labele hasai deklarasaun ida ne’ebe hamonu ka estraga organizasaun iha nasaun seluk, GRIB rezeita total deklarasaun Lere ne’ebe akuza Xefe GRIB ne’ebe dehan, atu halo intervensaun ba Timor-Leste,” dehan Vice Xefi GRIB. Ghazaly Ama La Nora iha konferensia imprensa, domingu (13/01/2013) iha Jakarta. 

Ghazaly haktuir, akuzasaun Lere katak, Hercules lori kilat tama teritoriu Timor Leste, nuudar organizadaun ida ligadu ba nasaun Republika Indoenzia, dehan nia, GRIB rekuza akuzasaun ne’ebe konsidera la fundamentu. 

 “Ba ami, deklarasaun Lere, tendensiu liu, tanba Hercules hetan apoiu husi sidadaun Timor Leste balun no maioria eis sidadaun Timor-Timur iha,” dehan Ghazaly. Deklarasaun Maijen Lere lakoi eis pro integrasaun fila mai Timor Leste ne’e konsidera atetude militar ida ne’ebe la apoiu unidade nasional hanesan esperensa ONU. 

“Ami husu, bainhira Hercules tama iha teritoriu Timor-Leste respeita nafatin konstituisaun lei iha nasaun ne’eba, ameasa kaer ami nia xefi, hanesan attitude arogansia Jenderal Lere,” dehan Ghazali. 

Relasiona ho ne’e, GRIB husu Maijor Jeneral Lere Anan Timur dada nia deklarasaun no husu deskulpa ba Hercules, tanba konsidera deklarasaun ne’e mos estraga relasaun nasaun rua ne’e nian, Governu Timor Leste tenki husu deskulpa ba governu Indoenzia. 

Entertantu, deputada husi Bancada FRETILIN Josefa Pereira dehan, Maijor F-FDTL Lere Anan Timur deklara kestaun ne’e tamba nia parte hatene situasaun politika ne’ebe la’o iha rai laran ne’ebe sei fo impaktu ba seguransa nasional. 

“Hau hanoin husu deksulpa ou la husu deskulpa ne’e relativu liu maibe kontas ves Indonesia halo pembantaian ba ita Timor oan, Indonesia seidauk mai husu deskulpa formal,” dehan deputada FRETILIN Josefa Pereira iha PN, (15/01). 

Nune’e mos, deputadu husi bancada Demokratiku (PD) Virgiliho Ornai dehan, Maijen Lere la merese husu deskulpa ba sidadaun Indonesia bai-bain ida. 

“Deskulpa iha kontekstu saida, laos defende lider masimu nasaun ida, pruzemplo Presidenti Republika, maibe ida ne’e sidadaun baibain ida,” dehan deputadu Virgilio Ornai Iha PN (15/01). 

Tanba ne’e deputadu husi bancada Demokratiku ne’e dehan, labele halo polimika hodi rejulta relasaun entre nasaun rua nian ba futuru.

Nota do blogue: VIVA O GENERAL LERE ANAN TIMUR!!!

.