Mario Carrascalao: “Prado La Kondis Ho Kondisaun Povu”

.

Jornal Timor Post - Kuarta - Feira, 16 Janeiru 2013 

Eis Vice Primeiru Ministru IV Governu Konstitusional, Mario Viegas Carrascalao konsidera kareta Prado (Luxu) ne’ebe estadu sosa ba deputadu sira la kondis ho kondisaun povu Timor-Leste. 

Nia esplika, tuir dadus, Povu Timor Leste pursentu 40 sei moris iha linha kiak, ida ne’e hatudu ba estadu tenki moe uza kareta luxu barak iha povu nia leet. 

“Hau hanoin kartea ne’e la kondis ho ita nia ekonomia no povu nia kondisaun social,” nia dehan ba Jornalista sira iha Hotel Timor, tersa (15/01). Carrascalao informa, deputadus presiza duni fasilidades atu fasilita servisu fiskalizasaun iha Distritus, maibe, kestaun maka nivel kareta ne’e ho marka Luxu, nia tenik, presiza kareta ne’ebe sufisiente atu ba to’o foho maibe la presiza Luxu. 

 “Entaun kareta ba deputadu la presiza sosa ho folin boot hanesan kada kareta U$63.000, maibe, loloos kareta ho folin U$20.000 mos bele sufisiente atu fasilita servisu deputadu ba tinan lima, importante liu mak kondisaun kareta bele halo viazen ba to’o distritu tomak,” nia esklarese. 

Carrascalao husu ba Estadu atu fo garantia kreditu ba deputadus, tanba deputadus balun iha osan no balun kondisaun moris hanesan povu baibain ne’ebe laiha osan atu nune’e deputadu sira mos bele kuidadu kareta ne’ebe estadu fasilita. 

 “Hau hanoin estadu fasilita kareta ba deputadu sira tenki liu husi kreditu katak, durante tinan lima kada fulan tenki kua salariu hodi deskonta ba folin kareta nian, maibe, karik tinan lima deputadu selu la hotu tenki uza garantia kareta hodi hetan kreditu husi banku,” nia haklaken. 

Aleinde ne’e, eis Governador Timor-Timur ne’e esklarese, dala barak deputadu sira uza kareta luxu ne’ebe estadu fasilita hodi tula ai inklui mos familia uma laran, ida ne’e tuir loloos la merese atu akontese tanba presenza povu, entaun servi povu mos tenki ho dignidade.

.