PM Sindir FP Bonal-Boxing “Funsionariu Publiku Ezizi Kadeira Especial, Xanana Ulun Moras”

.

Jornal Timor Post - Sesta - Feira, 18 Janeiru 2013 

Primeiru Ministru Xanana Gusmao soe lia (sindir) hodi temi katak, oras ne’e da-daun iha instituisaun Governu sira iha Funsionariu Publiku (FP) barak mak nakar, ho termu ne’ebe Xanana temi hanesan Boxing no Bonal. 

 “Balun fu’uk mutin moe, botak hotu ona, balun dehan boxing=(Botak mos Xefi), balun dehan bonal=(botak lanakal), ne’e husi Ministeriu Solidaridade haree problema ne’e, balun iha tinan lima mai dehan Ex-botak ne’e estadu tenki haree,” tenik PM Xanana iha ninia diskursu ba diretores, funsionariu publiku sira tomak iha Centru Convensaun de Dili (CCD), kinta (17/01). 

Nia konsidera, Funsionariu Publikuseidauk hatene saida mak funsionamentu makina estadu,”Iha uma laran ita seidauk hatene saida mak funsionamentu estadu nian, maka buat hotu ita hein deit mak orsamentu jeral estadu nian ne’e susar atu la’o ba oin,” dehan PM Xanana. 

Nia hatutan, realidade haree funsionariu barak mak falta hanesan, atan falta, atan servisu, maibe estadu ne’e tenki preukupa ba volume funsionariu publiku ho volume servisu ne’ebe ita oferese, tanba ne’e funsionariu publiku labele ezizi kadeira especial, ohin loron ita nia saude iha fasilidade diak maibe eziji fali direitu tenki kumpri mos dever. 

 “Ne’e halo hau ulun fatuk moras, hanesan mos iha ministeriu sira sira seluk hakarak especial, maibe especial ne’e hakarak haree husi ne’ebe, uluk iha funu laran, ami dehan katak dezenpenhu tenki haree ba rejultadu kuantidade ho kualidade furak tenki iha dedikasaun mos,” Xefe Governu ne’e lamenta. 

Nia husu ba Funsionariu publiku (FP), seitor privadu hamutuk ho Governu atu tenki displina dedikasaun servisu ba estadu no povu ida ne’e bele moris diak. 

“Tanba ita nia hanoin nebee luta ba ukun rasik an, ida ne’e mate ona, oras ne’e ita tenki servisu maka’as para ba loron aban sai fali heroi ba jerasaun foun,” Xanana enkoraja. 

,