“Povu Kesi Kabun, Deputadu Rodazen Prado”

,

Jornal Independente - Sesta - Feira, 18 Janeiru 2013

Povu Timor Leste oras ne’e dadaun tenke pasiensia hodi aperta sintu, tanba presu foos sa’e makaas no stcok foos komesa mamuk ona, maibe, nia reprezetante sira iha Parlamentu Nasional rodazen hela kareta foun Prado.

Foos marka Globus kilograma 30 ne’ebe durante ne’e fa’an ho presu U$18, oras ne’e dadaun sa’e ona ba U$30 ka besik 50% husi folin normal. Joanico Lemos, komunidade hateten, oras ne’e sira triste ho folin foos ne’ebe sa’e makaas, maibe reprezetante povu iha uma fukun PN la preokupa, sira konsentra ba rodazen kareta foun prado.

“Deputadu sira ridazen kareta prado, la preokupa ho folin fo’os ne’ebe sa’e,” dehan nia, iha Komoro-Dili (17/01). Iha fatin ketak, Amandio da silva hateten, uluk seputadu balun lakohi simu kartea foun, tanba povu sei moris hela iha kiak nia laran, maibe agora sira simu fali iha situasaun ne’ebe povu hasoru duni problema hamlaha.

 “Hau sente deskontente bainhira haree deputadu PN sira simu kareta Prado iha momentu ne’ebe povu hasoru folin foos ne’ebe sa’e maka’as,” dehan nia.

Entertantu, Jeronimo dos santos, komunidade taibesi hateten, tuir loloos deputadu sira ne’e bele uza deit kareta sira ne’ebe deputadu anterior sira uza atu osan ne’e bele utiliza fali ba responde nesesidade povu ninian, liu-liu problema foos.

,