Apaga Husi Lista V Governu Konstitusional: “Mikato Ezije PR Taur Matan Ruak Esklarese”

.

Jornal Independente - Kinta-Feira, 09 Agustu 2012

Eis Ministra Solidaridade Sosial (MSS) Maria Domingas Alves ‘Mikato’ nia naran hasai husi lista estrutura kintu (V) Governu Konstitusional nu’udar Ministra Defeza no Seguransa.

Primeiru Ministru Indizitadu Xanana Gusmao obrigamente apaga Mikato nia naran, tanba Prezidenti Republika Taur Matan Ruak sei duvida ba ninia abilidade.

Ba kestaun ne’e, Mikato eziji ba Prezidenti Republika atu esklarese ba publiku kona ba kestaun abilidade hodi hasai nia husi lista estrutura V Governu nuudar Ministra Defeza no Seguransa.

“Hafoin Primeiru Ministru aprejenta proposta ne’e ba Prezidenti rezieta no kestiaona hau nia abilidade, Primeiru Ministru telefone hau dehan, labele konverse Prezidenti, nune’e husu hau ba assume fila fali Ministra Sosial, maibe hau rezeita, tanba kadeira ne’e, Sra. Isabel mak assume ona,” dehan Mikato ba INDEPENDENTE, Kuarta (8/8).

Prezidenti Taur husu reforma lista estrutura governu koligasaun periodu 2012-2017 hafoin Primeiru Ministru indizitadu aprejenta, iha segunda liu ba.

“Hau husu ba Sr. Kay Rala xanana Gusmao ho Prezidenti Republika Taur Matan Ruak hodi esklarese ba publiku kona ba abilidade ne’ebe Prezidente Republika kestiaona hodi hasai hau, husi lista estrutura V Governu Konstitusional, nuudar Ministra Defeza no Seguransa,” Mikato kestiaona ba INDEPENDENTE.

Kestaun ne’e, iha serimonia tomada de posse, kurta (8/8) eis Ministra MSS Mikato la partisipa, nia mos konsidera kestaun abilidade hodi hasai nia laiha razaun klaru no nakonu ho diskriminativu.

“Dehan abilidade ne’e, kompara hau ho se, ou kestiaona tamba buat seluk tan? Tanba feto mak, haul abele salba guarda interese estadu nian,” haktuir Mikato.

Mikato haktuir, durante sei assume kargu Ministra MSS, nia parte sai ona membru Konsellu Estadu hodi rejolve problema dezlokadus, rejolve kombatente libertasaun nasional no seluk tan.

“Ka hau nia konviksaun ne’e FRETILIN, hau rejolve IDPs (deslokadus), halo edifisiu foun no halo jestaun diak, Ministru Defesa ne’e la’os tenki ema military, Ministru ne’e atu halo jestaun,” kestiaona eis Ministra MSS ne’e.

Tanba ne’e, nia dehan ho desizaun ikus Prezidenti Republika presija esplika ba publiku hodi povu tomak hatene.

.

“Prezidenti ka Primeiru Ministru tenke esklarese ba publiku, tanba hau feto, labele halo pembunuhan karakter, ne’e diskriminasaun estadu kontra CEDAW no Konstitusional,” deklara nia.

“Hau rezeita deklarasaun Prezidente nian, hau iha kompania barak hodi bele dezenvolve rai ne’e, hau sakrifika aan dezde rejistensia hodi serve povu, laos tenke sai membru Governu,” hateten nia ho fiar an.

Loloos nia pronto ona sai membru Governu tanba Primeiru Ministru rasik mak kontaktu, bainhira partisipa hela serimonia inagurasaun iha distritu, la’os nia parte mak husu kargu iha Governu.

“Hau la’os otonomista ka kriminozu maka bele hataka iha publiku, hau feto Timor, feto kombatente, hau rezeita hahalok ne’e,” lamenta nia.

.