Hatu’un Dignidade Feto: “Organizasaun Rede Feto Timor Leste Kondena Xefe Estadu”

.

Jornal Timor Post - Kinta-Feira, 09 Agustu 2012

Organizasaun Rede Feto Timor Leste kondena estadu, tamba sira konsidera hatun dignidade feto Timor, tanba Prezidenti Republika rasik esklui Maria Domingas Alves ‘Micato’ husi lista membru Kintu Governu nu’udar Ministra Defesa no Seguransa (MDS).

Diretor Rede Feto, Jacinta Lujina afirma, sira lamenta ho rajaun Prezidenti Republika, Taur Matan Ruak rasik katak, Micato laiha abilidade.

Liu husi konferensia imprensa ne’ebe hala’o iha salaun FONGTIL, Caicoli, Kuarta (08/8), Jacinta hateten, Taur hatun tebes dignidade feto no ignora feto nia kapasidade no mos diskrimina feto Timor Leste.

“Prezidenti Republika viola ona Konstituisaun RDTL artigu 16, 17 no 63 ne’ebe garante kona-ba igualidade direitu siviku no politika nia ezersisiu, labele iha diskriminasaun tanba sexsu atu asesu ba kargu politika,” nia hateten.

“Ami husu Prezidenti Republika atu labele haluha promesas ne’ebe hato’o ona durante kampania ba eleisaun Prezidensial 2012 katak, “konta ho hau iha movimentu feto nia serviso no tempu to’o ona halakon diskriminasaun iha ita nia rain”. Ida ne’e reforsa no esperitu maka’s ba feto sira nia kontribuisaun ba feto nia servisu iha dezenvolvimentu nasional,” Jacinta hatutan.

Nia mos husu ba Primeiru Ministru atu esklarese ba publiku kona-ba razaun no morivasaun saida mak propoin no indizita Sra. Maria Domingas Fernandes Alves ‘Micato’ ba Ministra Defesa no Seguransa la konsulta ho Estadu, iha ne’e Prezidenti Republika.

“Hanesan feto kombatente ida Sra, Maria Domingas Alves ‘Micato’ iha integridade no kompetensia atu salva guarda soberania nasaun ida ne’e, maibe tamba saida mak kansela Pozisaun Ministra de Defesa no Seguransa ba Sra. Maria Domingas Alves ‘Micato’, ne’e signifika nega no ignora integridade no kompetensia feto kombatente ida nian,” Jacinta Informa.

Ba kestaun ne’e, Kintu Governu Konstitusional ne’ebe lidera husi Prezidenti Partidu CNRT Kay Rala Xanana Gusmao, dadaun ne’e, nomea hikas Cerilio Cristovao, atual Xefe Departementu Intelejensia Timor Leste ba Micato nia fatin.

.