Sekjer ONU Ban Ki Moon: “Nasoens Unidus Orguilu Ho Susesu Eleisaun Prezidensial No Parlamentar”

.

Notisia Husi TVTL - Kuarta-Kalan, 15 Agustu 2012

Sekretariu Jeral Nasoens Unidade iha kuarta feira (15/8/2012) ne’e hala’o vizita ba dala 2 mai Timor Leste relasiona ho misaun UNMIT ne’ebe sei remata iha fulan Dezembru tinan ida ne’e, inklui Timor Leste mos konsege halo ona eleisaun Prezidentisla ho Parlamentar ho susesu.

Iha sorumutu ho Prezidenti da Republika Taur Matan Ruak no Xefe Estadu Nasoens Unidas ne’e fiar katak, Timor Leste bele kaer rasik nia seguransa ho diak.

Sekretaris Jeral Nasoens Unidas Ban ki-Moon Kuarta feira ne’e hala’o vizita mai Timor Leste ne’ebe simu husi espoza Primeiru Ministru Kristy Gusmao, Ministru dos Negosiu Estranjeiru Jose Luis Guterres, Xefi UNMIT no Maijor Jeneral F-FDTL Lere Anan Timur iha Aeroportu Internasional Prezidenti Nikolau Lobatu Dili.

Hafoin to’o iha Timor Leste Xefe Nasoens Unidas ne’e hala’o kedas vizita ba palasiu Prezidensial Nikolau Lobatu Dili, ne’ebe simu husi Prezidenti da Republika Taur Matan Ruak ho parade militar husi F-FDTL

Hafoin sorumutu ho Prezidenti da Republika Ban Ki Moon hateten, Timor Leste hetan progresu barak ona liuliu konaba eleisaun Prezidensial no Parlamentar ne’ebe lao diak, pasifiku no hakmatek ba pas no demorasia, unidade nasional no seguransa.

“Timor Leste hetan progresu diak barak ona, ita bot sira tenki orgulu tebe-tebes, hau hahi Timor oan hotu-hotu tamba eleisaun Prezidensial no parlamentar ne’ebe la’o susesu fulan hikus mai, prosesu ne’e la’o ho pasifiku no hakmatek, reflete duni Kumprimisiu Timor nia promete ba estabilidade, demokrasia no unidade nasional, hau mos hahi progresu signifikativu ne’ebe Timor Leste alkansa ona iha seitor seguransa, durante fulan 16 Polisia Nasional iha responsablidade tomak ba polisia nia servisu iha Timor Laran tomak,” dehan Ban Ki Moon.

Enterantu, Prezidenti da Republika Taur Matan Ruak hateten, iha enkontru ne’e koalia kona ba area 3 mak Timor Leste konsege harii Pas kona ba seguransa hafoin mandatu UNMIT remata no konaba parte edukasaun.

Vizita Sekretariu Jeral Nasoens Unidas ne’e koalia mos kona ba Problema Siria ne’ebe infrenta krizi politika no problema neebe mak nasaun Guine Bisau infrenta.

.