Kazu Lucia Lobato “Claudio: Tenki Iha Prova Foun”

.

Jornal Timor Post - Tersa - Feira, 15 Janeiru 2013 

Prezidenti Tribunal Rekursu Claudio Ximenes hatete, kazu eis Ministra Justica Lucia Lobato ne’ebe defensoria Publika sira prepara atu halo rekursu extraordinariu tenki iha prova foun, kuandu la iha Tribunal sei mantein nafatin ho desizaun ne’ebe mak iha ona. 

 “Kuandu iha rekerementu iha rekursu extraordinariu ne’e depois Tribunal sei haree, hau la hatene tama ka la tama, maibe tama karik sei haree duni, depois haree tiha atu simu ka la simu konforme tama duni iha situasaun ne’ebe lei fo duni rekursu extraordinariu,” Prezidenti Tribunal Rekursu Claudio Ximenes hateten ba Jornalista sira, segunda (14/01) iha Palasiu Prezidensial Bauri-Pite, hafoin sorumutu ho Prezidenti Republika Taur Matan Ruak. 

Claudio esplika, tuir lei hateten, kona ba halo rekursu extraordinariu no lei hakerek mos katak, bainhira mak hakerek rekursu extraordinariu, rekursu extraordinariu koalia kona-ba rekursu ida la’os hanesan bai-bain nian, tanba bele hatene sobre rekursu ida bele hatama maski desizaun metin tia, maibe haree katak tamba iha fali buat ruma hatudu katak iha desizaun uluk nian iha buat ruma ne’ebe sei falta tanba kestaun foun tebes bele iha influensia ba desizaun ne’ebe mak Tribunal uluk fo ona. 

“Lei fo dalan atu loke fali prosesu kazu eis Ministra justisa nian, por-zemplu iha desizaun Tribunal rekursu dehan mak ne’e (Prijaun tinan 5 liu), no bele mosu fali prova foun mais laos prova ne’ebe maka Tribunal haree tiha ona, prova foun ne’e mak hatudu katak, buat ne’e akontese hanesan ne’e la’os akontese buat seluk,” Claudio esplika. 

Nia esplika tan, Tribunal Rekursu iha nia funsaun ida de’it katak, atu halo justisa no fo desizaun kona-ba konflitu ne’ebe make ma lori ba Tribunal hodi halo justisa. 

“Ne’ebe desizaun ne’ebe mak juis fo tenki estuda, haree didiak no tetu didiak no fo tuir buat ne’ebe maka akontese labele fo deit nudar buat ne’ebe ema dehan akontese maibe la akontese hanesan ne’e, no la bele fo todan liu tan buat neebe la dun todan,” Claudio dehan. 

Defensor publiku kestiaona maka’as Desizaun tribunal Rekursu nian ba eis Ministra Justica, Lucia Lobatu ne’ebe mak tuir sira nia haree katak, la justu no la tuir regras ne’ebe mak iha. 

“Kona-ba ida ne’e haul abele komentariu kona ba kazu ida ne’e, agora ida ne’e hanesan kazu ida ka kazu seluk Tribunal tenki halo justica ne’ebe desizaun sai mai dehan dezolve tenki dezolve, tuir justica kuandu fo kastigu, fo kastigu tuir justisa, kuandu ema nia hahalok sala ne’e bo’ot, tenki fo kastigu boot maibe ladun boot karik labele fo kastigu boot liu sala ne’ebe nia komete,” dehan Claudio. 

Sorumutu ho Prezidenti Republika Taur Matan Ruak iha nia servisu fatin hodi koalia planu Tribunal Rekursu nian no ba servisu ne’ebe mak halo ona inklui servisu ne’ebe mak sei halo iha futuru.

.