PM Xanana Gusmao: “Governu Loke Luan Estrada Sei Laiha Kompensasaun Ba Plantasaun Komunidade”

.

Notisia Husi TVTL - Tersa-Kalan, 15 Janeiru 2013

Primeiru Ministru kay Rala Xanana Gusmao hateten, sei laiha konpensasaun ba platasaun ne’ebe moris iha estrada ninin, tamba planu governu sei loke luan estrada nasional iha Timor laran tomak.

Estrada nasional to’o rejional sai preokupasaun boot ba V Governu konstitusional, maioria estrada iha teritoriu Timor Leste laiha kondisoens diak, tamba ne’e governu komesa ona halo konstrusaun ba estrada rejional balun hodi loke luan molok atu tau alkatraun.

Xefe do Governu ne’e ho lian maka’as hateten, sei laiha kompensasaun ba plantasaun hanesan kafe iha estrada ninin no husu povu hotu tenki fo sira nia kontribuisaun ba dezenvolvimentu ida ne’e.

“Hau usu ba hotu-hotu katak laiha kompensasaun, ita hotu tenki kontribui ba dezenvolvimentu, kompensasaun (ganti rugi) ne’eliu tiha ona, ne’e tempu Indoenzia, agora laiha ganti rugi,” dehan PM Xanana Gusmao.

Xanana Gusmao hateten tan katak, povu Timor Leste 200.000 resin ne’ebe mate ba nasaun ida ne’e, se mak fo kompensasaun ba matebian sira ne’e, atu sai sidadaun ne’ebe diak tenki sai heroi foun ba nasaun. “Se ita kompensasi entaun kafe hun ida, 200.000 (rihun atus rua) be mate nenee husu kompensasi saida?

Sira la husu, sira mate ona, ita mak tau ita nia istoria ba memoria boot ida ba sira hotu nia mate, sira oferese vida ba mate e sira la husu estadu tenki selu sira, ne’ebe governu ida ne’e dehan, sai sidadaun diak, sai heroi foun ba nasaun,” dehan PM Xanana Gusmao.

Primeiru Ministru mos husu ba komunidade hotu tenki hatudu nasionalizmu ne’ebe boot hodi fo kontribuisaun ba rograma governu nian ne’ebe implementa hodi futuru nasaun ida ne’e ba oin ho diak.

.