Udan Boot Estraga Komunidade Nia Uma: “Eis Xefi Suku Husu OJE Labele Habokur De’it Ba Ukun Nain No Emprejariu Sira”

.

Notisia Husi TVTL - Kuarta-Kalan, 16 Janeiru 2013 

Komunidade Becora liu husi Eis Xefe Suku Miguel Marques husu ba ulun boot sira atu tau iha planu orsamentu Jeral do Estado hodi hadia baleta no estrada ne’ebe aat iha sidade laran. 

Ezizensia hirak ne’e, hato’o husi eis Xefe do Suku Becora, Dili, relasiona ho situasaun actual oras ne’e halo inundasaun mosu hodi estraga komunidade nia uma, sobu bee dalan ne’ebe sai aat hodi afeta liu ba komunidade kiik nia moris iha terenu. 

Miguel Marques reforsa liu tan katak, durante tempo udan iha tinan ida ne’e halo estragus barak ba estrada publiku ho komunidade nia hela fatin maibe governu seidauk hadia to’o agora. 

“Agora dadaun iha tempu rau udan hanesan ne’e, impaktu ba bee dalan no mos bee mos ba komunidade hasiru problema barak tebe-tebes, liu-liu iha area Becora ninian, hanesan baleta sira ne’e mota sobu arbiru, ponte nia kuak rai henek taka tiha hotu, estrada kuak barak halo kareta no motor sees malu chocke malu,” dehan Eis Xefe do Suku Becora. 

Tuir Xhefe do Suku ne’e mos husu ba governu no membrus parlamentu nasional atu labele hanoin deit ba sira nia interese maibe presiza fo atensaun ba povu kiik ne’ebe mak durante ne’e halerik hela iha terenu tamba moris la tuir kondisoens. 

“Orsamentu ne’ebe mak governu tau ba ne’e tenki haree didiak no kona duni ba nesesidade povu nian, labele tau ba kona (Habokur) deit ba emprejariu sira nia nesesidade, kona deit ba membru Parlamentu nia nesesidade, kona deit ba membru governu sira nia nesesidade, depois povu nia nesesidade sira la tau, tamba ita haree durante tempu udan povu barak halerik tamba, bee tama sira nia uma, bee dalan la dun diak, depois sira nia kondisaun moris mos labele la’o tanba sira hasoru ho problema sira ne’e,” dehan Miguel Marques. 

Eis autoridade lokais ne’e relata liu tan katak, oras ne’e tempu udan ho volume ne’ebe forte presiza hadia lalais fatin hirak ne’ebe mak sai hanesan risku ba bee hodi estraga komunidade nia hela fatin. 

.