Assessor Ramos-Horta nian no membru senior CNRT, Longuinhos Monteiro, subar kilat barak iha nia uma - Vídeo

Timor Hau Nian Doben

Longuinhos Monteiro, atual assessor Ramos-Horta nian nomos ema senior CNRT subar kilat barak iha nia uma iha Likisa tuir buska ida ke autoridade polisial halo ohin loron iha nia rezidensia.

Maske lei bandu ema ke laos militar kaer kilat, Longuinhos Monteiro, bebeik hanoin katak nia laos iha lei nia okus tanba nia hetan protesaun masima hosi lider historiku, Xanana Gusmão.

Tuir informasaun ke sirkula iha media sosial, Xanana Gusmão halo kedas intervensaun hodi proteje Longuinhos Monteiro nomos "halo ameasa ba autoridade sira ke halo buska iha Longuinhos nia uma no halo apreensaun ba kilat ke sira hetan".

Tuir Timor Hau Nian Doben fonte ida nia dehan katak," Timoroan hotu-hotu tenki kuidadu tanba Longuinhos ema traidor boot no nia no ninia ema bele kria instabilidade iha ita nia rai laran ka uja kilat hodi halo intimidasaun ba povu no bele mos uza kilat hodi obriga povu vota CNRT".

" CNRT nia boot hamoorok ba poder no ita espera katak krize labele mosu tan hodi oho povu no hakanek ita nia povu doben. Foin ita hare'e ema oho malu fali, ita tenke loke matan didiak. Eka balun bele hakarak estraga ita nia estabilidade", haktuir tan.

"Keta haluha katak ema barak iha CNRT nia laran ke sai autor ba krizi 2006 sei iha kilat barak iha sira nia liman, no ema sira ne'e perigozu tebes, espera katak autoridade bele kaptura sira nia kilat hotu hodi povu moris ho hakmatek", remata.

Longuinhos Monteiro entrega ona nia aan ba autoridade sira hodi submete ba investigasaun hosi autoridade polisial sira. 

Bele hare'e video iha ne'e.