“Mate Restu 12 Novembru Sadik Veteranus”

.

Jornal Timor Post - Tersa-feira, 30 Outubru 2012 

Mate Restu 12 Novembru 1991 husu ba governu atu halo regulamentu ida ba luta nain veteranus no kombatentes sira atu halo juramentu hanesan ho materestu Santa Cruz. 

Prezidenti Komite 12 Novebru 1991 Gregorio Saldanha husu ba V Governu Konstitusional atu kria regulamentu ne’ebe hanesan ho mate restu 12 Novembru oras ne’e dadaun halo juramentu, nune’e minimiza nomeru veteranus kombatentes ne’ebe maka ohin loron aumenta maka’as. 

Tuir Gregorio nia haree, ohin loron kombatentes no veteranus barak maka rejista iha Sekretariu Estadu assuntu kombatentes rihun ba rihun,” ami husu mos ohin sa ba klandestina sira atu halo juramentu hanesan mate restu 12 Novembru ne’ebe hala’o dadaun,” Gregorio hateten. 

Iha fatin hanesan, Xefi Suku Motael, Cornelio de Araujo Lopes mos husu ba Governu para hala’o mos juramentu, tanba husi juramentu maka bele hetan lia loos, tanba termu ne’e maka uza iha juramentu, jura ba matebian sira ne’ebe mate ba funu, rai lulik no nai maromak, kuandu ida ne’e mak la banati malisan sei babeur.

.

Familia Sebastiao Tristi, “28 Outubru Naran Lakon”

.

Jornal Timor Post - Tersa-feira, 30 Outubru 2012 

Afonso Gomes, aman husi saudozu Sebastiao Gomes, laran tristi tanba depois independensia laiha tan instituisaun husi Estadu no Komite 12 Novembro maka rekoinese tan 28 Outubro hanesan hun husi 12 Novembru. 

 “Hanesan familia ami la husu buat barak, maibe ami ejiji deit ba orgaun estadu no komite 12 Novembru atu labele haluha 28 Outubru, tanba husi 28 Outubru mak hamosu 12 de Novembru, se laiha 28 outubru, 12 de Novembru mos sei la mosu,” dehan Afonso Gomes iha Vila verde sesta (26/10). 

Nia hateten katak, loloos 28 Outubru no 12 Novembru labele fahe malu, buat rua ne’e tenki lao hamutuk, atu nune’e ita bee konta istoria lolos, para nune’e bele apar ho akontesementu uluk. Afonso realsa tan katak, Sebastiao nia mate iha igreija Motael ne’e, tamba defende rai ida ne’e, laos tanba defende merah putih, maibe tanba sai make ma hotu la preokupa ba loron istoriku sebastiao nia mate iha Motael ne’e.

 Durante ne’e, hanesan familia ami nonok hodi rona ema hotu konta sira nia sofrementu, ema barak aumenta sira nia istoria, katak sira mak autor iha akontesementu ne’e hodi haluha Sebastiao nia naran. 

 Purtantu, lolos orgaun estadu sira mak iha dever atu buka tuir problema sira ne’e, ami familia la iziz buat ida, maibe keta halua ona 12 de Novembru nia hun karik.

Afonso konfesa katak, sira nia oan ida deit mak Sebastiao ne’ebe mate ho idade 16 anos, sira nain rua laiha tan ema ida mak atu hamaluk, dala barak suspeira maibe se los mak atu rona, portantu hanoin ba akontesementu sira ne’e susar tebes atu bele imajina, tanba sa mak moruk ne’e bele atravesa iha sira nia uma laran.

.