Mina Maran Ameasa Estabilidade

.

Timor Post - 15 Setembru 2017

Díli - Adjuntu Diretór Organizasaun Naun Governamental Fundasaun Mahein (FM), João Almeida afirma, kuandu governu la tau atensaun iha investimentu setór produtivo no sustantibilidade, sai ameasa bo'ot ba estabilidade kuandu mina maran.

Tanba orsamentu Timor Leste, garantia hosi fundu minarai ba dezenvolvimentu no subsidiu ba idozus, veteranus aktividades sosiais seluk tan.

"Se mina maran ita laiha investimentu ba setór produtivu, osan hotu saida maka ita sei kontinua, signifika bele provoka mós situasaun, ita labele ona selu polisia, funsionariu, infermeiru no profesor sira ne'e problema ita. Se ita laiha osan hodi finansia atividade sira ne'e ita bele foti kroat bele hatudu malu," adjuntu diretór FM hatete ba estudante Institutu Superior Cristal Sabadu.

Nia haktuir, atu labele iha problema ba estabilidade bainhira mina Timor Leste maran, governu tenki investe iha setór produtivu.

"Ita tenki investe ba setór produtivu, iha ne'ebé bele hetan fila fali osan tanba osan laiha saida mak akontese ba estabilidade nasionál, ita labele selu buat hotu-hotu no ita labele halo buat hotu-hotu no instabilidade ne'e bele akontese," nia dehan.

Iha fatin hanesan Reitor Institutu Superior Cristal, Sebastião Pereira afirma, hosi hanoin hirak ne'e atu fó hanoin nafatin ba estudante, atu bele hatene progresu.

"Esperiensia ne'ebé sira fahe liu-liu iha area defeza no seguransa iha parte petroliferu nian ida ne'e diak teb-tebes, tanba ita Timor barak maka seidauk hatene osan ne'e, mai husi ne'ebé, ne'ebé ida ne'e para estudante sira hatene oinsá halo antesipasaun enkuantu mina maran," nia dehan.

Tanba ne'e husu nafatin katak seminariu ne'e tenki iha kontinuidade para ema hutu bele asesu informasaun kona-ba mina Timor nian. (jos)

.