La iha dalan seluk, Rui Araujo tenki rezigna aan tanba kazu Emilia Pires

.

Maubere Tuba Rai Metin

Rui Araujo hanesan xefi governu nomos hanesan entidade ida ke fo’o servisu ba eis Ministra Finansas, Emilia Pires, karik nia moe oituan tenki rezigna ninia aan, laiha dalan seluk, tanba Rui mak lider governu nian, nomos tanba nia mak entidade ke fo’o servisu ba Dra. Emilia Pires hodi reprezenta ita nia nasaun iha rai liur. Karik nia boneka ida maibe agora boneka tenki simu konsekuensia hosi nia hahalok aat.

Primeiru Ministru uainhira fo’o fiar ba Emilia Pires nia hatene ona katak senora Emilia ema ho problema boot iha ita nia Tribunal, nia sai arguida iha kazu korupsaun ida no nia hein sentensa hosi Tribunal, maibe Rui sei fo'o ba nia servisu diak ke simu osan barak. Rui Araujo hanesan Xefi Governu nia tenki assumi total responsabilidade ba ninia hahalok aat ida ne’e hasoru Maubere Oan nomos hasoru nasaun lulik RDTL. 

Ema balun hakilar iha Facebook katak kulpa Tribunal nian tanba Emilia halai maibe hanoin ida ne’e sala, tanba Rui Araujo mak fo’o garantia ba Tribunal katak senora Emilia Pires sei la halai, nia sei fila ba Timor-Leste hodi hatan iha Tribunal, ne’ebe Tribunal autoriza  nia ba rai liur hodi hala’o ninia servisu tanba sira fiar Rui Araujo ninia garantia katak Emilia Pires sei fila. Maibe ha’u hatene katak Emilia sei la fila ona ba ita nia rain, tanba senora Emilia lakohi ba Hotel Bekora durante tinan 10, foin nia hetan nasionalidade foun ida no nia nega katak nia Timoroan, nia agora ema Portugues. Moe la iha duni…

Emilia Pires iha direitu tomak hodi hili ninia nasionalidade, nia aman malae nia oan, no nia iha direitu tomak atu sai ema portugues, maibe, uainhira nia hetan kadeira ministra nian, nia uza nasionalidade saida? Karik nia sai asesor Rui nian ho pasaporte nasaun seluk nian, no Rui fo’o servisu ho responsabilidade boot ba malae ida? To’o ona tempu atu troka lei ke fo’o dalan ba ema ho pasaporte rua kaer ukun iha ita nia rai doben ka iha ita nia administrasaun publika tanba ema barak ho pasaporte rua la iha nasionalismu, la terus hamutuk ho Maubere Oan iha tempu funu, balun mai de’it hodi xupa ita nia osan no goza Maubere Oan nia rikusoin. Lei tenki troka hodi asegura katak situasaun hanesan Emilia nian la bele akontese tan, ita la bele husik ema oportunista mai ita nia rain no sai ema boot no uainhira sira halo sala, sira bele halai lakon ba nasaun seluk. 

Situasaun Emilia nian halo ita moe no hatun ita nia dignidade hanesan nasaun iha mundu nia leet. Maibe hau hare katak ukun nain sira nonok de’it, sira evita koalia kona ba kazu Emilia Pires, lekirauk sira iha Parlamentu Nasional tanba sa mak la hasai rezolusaun ida hanesan sira halo ba Mauk Moruk? Tanba sira tauk, lekirauk sira ne’e tauk tanba balun hatene katak Emilia Pires iha ema boot balun iha ninia kotuk no proteje nia, tanba Emilia Pires hatene foer barak ke ukun nain sira halo hasoru povu no nasaun hodi sira no sira nia familia naok povu nia osan. Tanba ida ne’e maka sira hotu nonok no la eziji responsabilidade ba Rui Araujo nia garantia katak Emilia la ba halai no nia sei fila ba Timor-Leste hodi hatan iha Tribunal. Rui Araujo mak tenki ba duni hatan iha Tribunal no hetan responsabilidade iha povu nia oin, tanba nia mak sai garantia katak Emilia sei fila. Tribunal aten brani ba bolu Rui Araujo hodi hatan iha Tribunal ka mos tauk nia tanba nia sai boneka iha Maun boot balun nia liman? Komplikadu los ka lae?

Rui, hau mak ita-boot hau moe hau nia aan no hau rezigna aan. Durante ita-boot nia ukun ita la halo tee nein ida ba ita nia nasaun, halo de’it ita moe, fo’o previlejius ba ita-boot nia belun no aat liu tan, amiasa ita nia veteranus ke hakarak halo manifestasaun pasifika no haruka oho luta nain ida tanba nia koalia hasoru ita-boot ninia patraun sira nia governasaun no koalia hasoru ita-boot nia governu. Mauk Moruk imi oho tiha ona, maibe hau fiar katak nia babeur duni imi hotu, tanba povu loke ona matan, hodi hare katak imi traidor da patria duni, katak imi servisu ba imi nia aan rasik no imi la iha nasionalismo ka domin ba rain lulik ida ne’e, imi bandidos duni! Mauk Moruk iha Lalehan hamanasa tanba imi sei simu imi nia justisa, imi sei simu imi nia kastigu, kestaun tempu de’it.

Senor Primeiru Ministru, ita-boot la moe gasta osan povu nian? Monu de’it biskleta no tenki ba kedas ba Singapura hodi hetan tratamentu? La bele hetan tratamentu iha HNGV hanesan ema hotu ka? Tuir hau nia belun ida, nia dehan mai hau katak Rui nia office troka fali ba Singapura, laos ona iha Dili, moe la iha liu. Imi mak goza duni independensia ida ne’e, povu sai  bainaka iha ninia rain rasik. 

Povu tenki eziji ba Rui Araujo ninia responsabilidade iha kazu Emilia nian, tanba nia mak fo’o garantia katak nia sei fila, karik tribunal la halo, povu sei iha poder hodi hatun Rui Araujo no eziji ninia demisaun, tanba nia la servi ona hodi sai primeiru ministru RDTL nian. Nia halo ona traisaun barak ba ita, tenki tebe sai nia. 

.