Kazu Kilat Lakon: "L-7 Husu Longuinhos Responsabiliza"

.

Jornal Nasional Diario - Segunda, 10 Setembru 2012

Eis Komandante das FALINTIL Regiaun III, Corneilo Gama Alias L-7, lamenta tebes ho kilat lolon ida ne'ebe autor balun iha Polisia Nasional Timor Leste (PNTL) halo lakon, foin lalais ne'e.

L-7 konsidera, kilat ne'ebe lakon iha instituisaun PNTL ne'e hatudu momos erru no inkapasidade husi Komando geral PNTL, Komisariu Longuinhos Monteiro.

Eis membru Parlamentu Nasional iha II legislatura ne'e husu ba komando PNTL atu toma responsablidade ba patrimonia estadu nian ne'ebe lakon leet deit.

"Ami FALINTIL preokupa tebes ho kilat ne'ebe lakon iha PNTL no Komando PNTL ne'ebe lidera husi Longuinhos tenki responsabliza," afirma L-7 hodi responde JNDiario iha salaun CAVR, Dili, Sabadu (8/9).

L-7 mos fo sasin katak, iha tempu rezistensia nian mak membru FALINTIL ida halo lakon kilat tenki halo kedas investigasaun emediatamente, tantu iha tempu ukun an neé mos, mak akontese fali kilat lakon, signifika autoridade kompotente sira la iha kbiit kapasidade atu kontrola kilat hirak ne'e.

Nia dehan tan, se situasaun nune'e nafatin mak loron ruma kilat tarutu fali iha Timor Leste no rezulta povu ruma mate, maka komando PNTL tenki toma responsablidade.

Hatan kona ba kilat ne'ebe lakon, sei fo ameasa ba estabilidade nasional, tuir L-7 katak, saida deit, bele kainaun,morteiro atus ida ka kilat hira mos, FALINTIL la tauk, maibe husu responsablidade PNTL atu rekoilha lalais kilat ne'ebe lakon.

Ba kestaun Kilat lakon ne'e, antes neé mos Komandante Jeral PNTL Longuinhos Monteiro hateten, to'o agora kilat ne'e seidauk hetan, no ema ne'ebe halakon kilat ne'e suspende ona no hein atu prosesu ba Tribunal.

.

Dr. Mari Alkatiri: "Konseitu Maubere Mak Loke Dalan Ba Independensia"

.

Jornal Nasional Diario - Segunda, 10 Setembru 2012

Fundador FALINTIL, aktual Sekretariu Jeral Partidu FRETILIN Dr. Mari Alkatiri hateten, konseitu maubere neé mak halibur povu hamutuk hodi loke dalan ba independensia Timor Leste ninian.

Iha Tempu kolonializasaun Portugues, Maubere refere liu ba ema kiak mukit, ki'ik neébe la asesu ba edukasaun no kbit la'ek, maibe hafoin konseitu maubere ne'e muda ba politiku hodi halibur povu hamutuk hodi luta ba Independensia no hetan rejultadu "Ukun Rasik An".

"Konseitu maubere ho Foho Ramelau ne'e hamutuk fo dalan, loke dalan ba povu tomak atu kumprende diak liu prosesu independensia, bainhira transforma maubere ba konseitu politika hotu-hotu ne'ebe asume hanesan halo parte hanesan povu ida,"afirma Eis Primeiru Ministru (PM), Mari Alkatiri, sesta (7/9) iha Muzeum Rezistensia UNTL, Dili, liu husi seminariu lansamentu livru istoria guerilha ne'ebe mak Universidade Timor Leste (UNTL) produs.

Esplika liu husi Alkatiri katak, Maubere mai husi lian mambae ne'ebe ikus mai sai konseitu ida iha tinan 1973 ho artigu husi fundador FALINTIL, Jose Ramos Horta nia ne'ebe relata lian Jornal 'A Voz Timor ho Titlo "Maubere O Meu Irmao Levanta Aqui" ne'ebe hakerek iha tempo ne'eba artigu refere revolusionariu tebes, entertantu FRETILIN uza konseitu refere nudar konseitu Politika.

"FRETILIN komesa uza maubere ne'e hanesan konseitu ida politiku i liga ba Ramelau, Basaa, haree deit Hino Foho Ramelau husi konseitu Maubere, buat rua ne'e liga ba malu para atu fo forsa ba Luta Independensia iha ne'eba, signifika katak, maioria Timor mak Maubere tanba ain tanan, la asesu ba eskola, tanba uma atu hela mos laiha, kondisaun neé kabe ba konseitu ida ne'e," haktuir Alkatiri.

Iha Oportunidade ne'e mos, Frenti Diplomatika iha tempu rezistensia ne'e, husu ba hakerek nain istoria Luta Timor Leste ninian atu hakerek istoria ne'ebe ho justu no lolos.

Iha inicio mosu partidu iha tinan 1974 no liu-liu wainhira proklamador Francisco Xavier do Amaral uza naran Maubere no Buibere hanesan naran no lisan Timor nian nebe pertensia deit ba ema mukit, ki'ik no kbiit la'ek iha tempu kolonializasaun Portuguesa.

.