Kazu Kilat Lakon: "L-7 Husu Longuinhos Responsabiliza"

.

Jornal Nasional Diario - Segunda, 10 Setembru 2012

Eis Komandante das FALINTIL Regiaun III, Corneilo Gama Alias L-7, lamenta tebes ho kilat lolon ida ne'ebe autor balun iha Polisia Nasional Timor Leste (PNTL) halo lakon, foin lalais ne'e.

L-7 konsidera, kilat ne'ebe lakon iha instituisaun PNTL ne'e hatudu momos erru no inkapasidade husi Komando geral PNTL, Komisariu Longuinhos Monteiro.

Eis membru Parlamentu Nasional iha II legislatura ne'e husu ba komando PNTL atu toma responsablidade ba patrimonia estadu nian ne'ebe lakon leet deit.

"Ami FALINTIL preokupa tebes ho kilat ne'ebe lakon iha PNTL no Komando PNTL ne'ebe lidera husi Longuinhos tenki responsabliza," afirma L-7 hodi responde JNDiario iha salaun CAVR, Dili, Sabadu (8/9).

L-7 mos fo sasin katak, iha tempu rezistensia nian mak membru FALINTIL ida halo lakon kilat tenki halo kedas investigasaun emediatamente, tantu iha tempu ukun an neé mos, mak akontese fali kilat lakon, signifika autoridade kompotente sira la iha kbiit kapasidade atu kontrola kilat hirak ne'e.

Nia dehan tan, se situasaun nune'e nafatin mak loron ruma kilat tarutu fali iha Timor Leste no rezulta povu ruma mate, maka komando PNTL tenki toma responsablidade.

Hatan kona ba kilat ne'ebe lakon, sei fo ameasa ba estabilidade nasional, tuir L-7 katak, saida deit, bele kainaun,morteiro atus ida ka kilat hira mos, FALINTIL la tauk, maibe husu responsablidade PNTL atu rekoilha lalais kilat ne'ebe lakon.

Ba kestaun Kilat lakon ne'e, antes neé mos Komandante Jeral PNTL Longuinhos Monteiro hateten, to'o agora kilat ne'e seidauk hetan, no ema ne'ebe halakon kilat ne'e suspende ona no hein atu prosesu ba Tribunal.

.

Longuinhos Monteiro: “PNTL To’o Agora Seidauk Rekoilla Kilat Ida Ne’ebe Lakon”

,

Notisia Husi TVTL - Sesta-Kalan, 07 Setembtu 2012

To’o oras ne’e Polisia Nasional Timor Leste (PNTL) seidauk hetan kilat ne’ebe halakon husi ofisial PNTL.

Komandante Jeral PNTL Longuinhos Monteiro husu ba ema ne’ebe foti kilat ne’e atu intrega ba komando PNTL.

Komandante Jeral PNTL informa kestaun ne’e iha serimonia asina akordu ho KAK, Sesta-feira semana ne’e iha edifisiu KAK.

Komandante ne’e mos informa katak, oras ne’e dadaun instituisaun PNTL sei hala’o nafatin investigasaun ba kilat ne’ebe lakon no ofisiais PNTL ne’ebe halo lakon kilat oras ne’e suspende ona.

“Klaruke ro’o agora kilat ne’e seidauk rekoila, ami tenta hela atu identifika, tamba ema ne’ebe foti, karik tauk atu intrega tamba prejudika ba nia an, maibe ami informa nafatin katak, ida ne’e kilat estadu ninian, favor intrega fali kilat ne’e ba estadu,” dehan Longuinhos.

Iha parte seluk, nia husu ba ema ne’ebe foti kilat bele intrega ba instituisaun PNTL tamba kilat ne’e estadu Timor Leste nian.

Komandante ne’e mos rejeita informasaun neebe hateten katak, besik kilat 30 maka lakon iha instituisaun PNTL.

.

"Komandu PNTL Sei Demite Membrus Nain Hitu"

.

Jornal Nacional Diario - Kuarta-feira, 05 Setembru 2012

Komandante Jeral Polisia Nasional Timor Leste (PNTL), Komisariu Longuinhos Monteiro informa katak, iha tempu badak, komando Jeral PNTL sei Pecat (demite-red) membru Polisia nain hitu (7), tanba la tama servisu, elementu Polisia nain hitu neé kompostu mane 5 no fetu 2.

"Iha tempo badak nia laran, hau rasik sei hasai ka pecat membrus nain hitu, ne'ebe kleur ona ou fulan hira ona nunka mai tama servisu, sei fo koinesementu ruma mai komando, iha mane nain 5 no feto nain 2, sira ne'e agora tama ona ba prosesu pecat nian," informa Komisariu Longuinhos Monteiro iha Quartel Jeral PNTL Caicoli, Dili (04/9).

Komisariu PNTL ne'e mos haktuir tan katak, bazeia ba regras servisu PNTL nian, kuandu membru ruma mak falta servisu no laiha koarta lisensa husi komandu, komandu iha obrigasaun ou dever atu toma medidas.

Longuinhos haktuir tan katak, tuir regra servisu instituisaun PNTL nian, kuandu iha membru ida mak falta durante loron lima (5), sei bolu hodi fo prosesu demisaun ba nia, maibe kuandu liu ona loron 5, ninia prosesu kontinua ba prosesu displinar nian.

.

"PNTL Sei Disidi Vida Oknum Halakon Kilat"

.

Jornal Timor Post - Kuarta-feira, 05 Setembru 2012

Komando Jeral Polisia Nasional Timor Leste (PNTL), liu husi konsellu Superior (KS) PNTL sei inkontru hodi disidi distinu oknum ne'ebe halakon kilat FNC.

Ba Josrnalista sira iha Kuartel Jeral PNTL, Caicoli, Dili, Tersa (04/9), Komisariu Longuinhos Monteiro informa katak iha segunda (03/09) liu ba, inspetur jeral relata ona ba komando Jeral katak, prosesu investigasaun ba kazu kilat lakon, hela oituan deit atu bele konklui investigasaun kona-ba prosesu displinar.

"Inseptur Jeral informa ona mai hau, maibe nia seidauk intrega rekomendasaun ida mai hau, ida ne'e prosesu justica ne'ebe departementu Justica PNTL ninia maka halaáo, hau so simu kuandu sira kompleta ona investigasaun, rekomendasaun, pena suspensaun depois hau bele asina ida ne'e," dehan Longuinhos.

Iha parte seluk, hatan ba membru Parlamentu nasional atu koamndo jeral PNTL halo justifikasaun ba kilat ne'ebe lakon, Komisariu Longuinhos hatan katak, prosesu kilat lakon ne'e nia parte seidauk bele halo esplikasaun, tanba prosesu ne'e rasik seidauk toó iha ninia liman.

"Agora prosesu iha hela investigasaun, to'o iha final ita sei haree, ita hetan ona ne'e tenki hatene ona, ida foti ne'e mos tenki responsabliza, tanba ne'e, nauk ona, kilat laiha ain atu bele laó mesak,"afirma Komandante Jeral PNTL Longuinhos.

.