Xanana- Alkatiri Enkontru Subar

.

Timor Post - 01 Agostu 2014

Díli - Molok konferénsia extra-ordináriu Partidu Congressu Nasionál Rekonstrusaun Timor (CNRT) realiza, Primeiru Ministru (PM), Kay Rala Gusmão ho eis PM, Mari Alkatiri hala'o enkontru segredo iha nia rezidénsia Lecidere, Kinta (31/7). Enkontru segredu ne'e hala'o tuku 9:00 to'o 11:00.

Hafoin remata enkontru PM Xanana fila ba servisu fatin Palásiu Governu, no eis PM, Mari Alkatiri fila ba servisu fatin eskrit´riu Zona Especial Ekonómia Sosiál Merkadu (ZEESM) iha Timor Plaza.

Entretantu, eis PM ne'e rejeita atu fó informasaun sobre diskusaun ne'ebé halo.

"Ami na'in rua diskute kona-ba projetu Oe-Cusse, inklui serbisu sira iha nasionál, tanba Oe-Cusse mós programa nasionál ida.Konferénsia CNRT ne'e konferénsia partidu seluk, FRETILIn la-hetan konvite, ami la-hafuhu festa. Kona-ba planu rejignasaun Xanana nian ami la-ko'alia ne'e depende ba katuas Xanana, Rejigna ka la-rejigna tenke tetu didi'ak ba nesesidades nasaun nian," Mari esplika ba jornalista sira iha Timor Plaza, Kinta (3177).

Tuir informasaun ne'ebe Timor Post rekolla, lider nain rua ne'e deside PM Xanana Gusmão rejignasaun molok realiza konferénsia extra ordináriu partidu CNRT nian iha Sentru Konvensaun Díli ne'ebé sei akontese iha loron 2 to'o 3 fulan Agostu tinan ne'e.

Maibé, Kay Rala Xanana Gusmão atu rejigna-án depende ba konfrensia partidu CNRT nian.

Antes ne'e, Prezidente Partidu CNRT, Xanana Gusmão, deklara ona nia planu rezignasaun hosi kargu PM iha fatin públiku, Sentru Konvensaun Díli no fatin ne'ebé sagradu tebes, iha Parlamentu Nasional no Palasiu Prezidensiál Nicolau Lobato.

Eis Komandante luta ne'e deklara sei hato'o nia rezignasaun hafoin simeira Comunidade Paíse da Língua Portuguesa (CPLP), ne'ebé Timor-Leste sei lidera tinan rua nia laran.

"Hau nia rezignasaun sei fó sai depois simeira CPLP ne'e remata," Xanana hatete ba jornalistas sira.

Tuir Xanana, rejignasaun ne'e hodi bele simu kargu todan ne'e atu bele brani infrenta rezolve problema nasaun nian.

Desizaun ne'e rasik Xanana informa ona ba Prezidente Repúblika, Taur Matan Ruak, eis PM Mari Alkatiri, eis Prezidente Parlamentu Nasionál, Francisco Guterres Lu-Olo, eis Prezidente, José Ramos Horta no publiku sira,

Ho informasaun ne'ebé hato'o eis Prezidente Repúblika, José Ramos Horta hahu fihir ona jerasaun foun ne'ebé tama iha kategoria atu ka'er ukun.

Figura ne'ebé Horta fihir mak Fernando La-Sama de Araújo, eis ministru Saúde, Rui Maria Araújo. (vas)

.