Julio Hornay:“Povu labele paniku ho isu ISIS”

.

Jornal Nacional Diário - 20 de janeiro de 2016

Komandante Jeral Polisia Nasional Timor Leste (PNTL), Komisariu, Julio da Costa Hornay husu povu labele paniku ho isu grupu terorista ISIS (Islamic State of Iraq and Syria) tama ona iha Timor Leste.

“Ha’u husu para ita hotu alerta atu nune’e bele fo informasaun lalais mai polisia karik iha ema ka buat ruma maka deskonfia, tanba iha informasaun ne’ebe maka ami simu katak ISIS tama mai ita nia rai, maibe husu atu povu hotu labele paniku ho informasaun ne’e,”deklara Komandante Jeral PNTL, Komisariu Julio da Costa Hornay ba Jornalista iha Kuartel Jeral PNTL, Cacoli-Dili, Tersa (19/01) horseik.

Nia hateten, povuv tomak labele paniku, tanba PNTL ho Falintil Forsa Defeza Timor Leste (F-FDTL) nafatin hamutuk kooperasaun hodi asegura nasaun ida ne’e.

Nia hatutan, maske reasaun ISIS iha Sarina-Indonesia ne’e TL buka maineira hodi asegura nasaun ne’e husi ameasas ISIS nian, no koopera ho parte Indonesia nia para bele fo informasaun karik iha ema terorista sira balun halai mai TL.

“Ita koopera ho Indonesia nune’e sira bele fo informasaun mai ita karik iha indikasaun ruma ema sira ne’e balun halai mai TL, Atu ita bele alerta lalais ita buka total maneira para ita atua,”afirma Julio Hornay.

Tanba ne’e, nia husu ba komunidade sira hakmatek, maibe tenki alerta signifika tilun ho matan labele taka, hodi buka nafatin informasaun konaba asuntu refere.

Nia mos dehan parte Polisia kontaktu ona ho parte Defeza nian hodi instituisaun rua ne’e ninia intelejensia sira servisu makas liu detekta ema ne’ebe maka deskonfia membru ISIS tama mai TL.

Oras ne’e dadauk iha media social tau ona foto grafia ema ne’ebe maka deskonfia membru ISIS tama ona mai TL ho naran ‘Fazar’ husi Nusa Tengara Timur (NTT) iha loron (15/01) liu ba, husi fronteira rai maran. Eus

.