AKUZA FÓ PROJETU BA FAMILIA, ALKATIRI: “AKUZADOR HALO ALIANSA HO DIABU”

.

Jornal Nacional Diário - 10 de junho de 2016

Prezidenti Zona Espesial Ekonomia Sosial Merkadu (ZEESM), Timor Leste (TL), Mari Alkatiri deklara, ema balun ne’ebé mak akuza nia fó projetu ba nia familia sira ne’e, tanba sira halo aliansa ho diabu hodi sai kampiaun ba dezenvolvimentu.

“Sira halo aliansa ho diabu hatais ropa oin-oin depois  subar inventa fali diabu seluk hodi subar sira nia aliansa, lalika halo ema ida atu sai diabu, ita bo’ot sira mak halo aliansa uluk ho diabu agora atu subar aliansa ho diabu ne’e atu sai fali kampiaun ba dezenvolvimentu,” dehan Mari Alkatiri liu husi konferensia imprensa iha edifisiu ZEESM Oecusse, Kinta (9/6/2016).

Alkatiri esplika katak, iha projetu ZEESM ne’e nia familia nunka involve iha laran, la manan iha projetu ZEESM inklui la tuir tan prosesu tenderizasaun. No iha prosesu tenderizasaun ne’e mós la’os nia mak halo avaliasaun, maibé parte Comissão Nacional Aprovizionamentu (CNA) sira mak halo avaliasaun, nune’e nia la iha kompeténsia atu fó projetu ba  nia familia.

“Hotu-hotu komesa rekunhese susesu iha Oecusse, tanba hakarak inventa saida mak negativu para halo polítika prepara-an ba eleisaun 2017”, koalia Alkatiri.

Nia esplika, uluk nia sai Primeiru Ministru ema barak halo akuzasaun ba nia, nune’e nia rezigna-an ema halo investigasaun ba nia inklui nia familia, maibé la hetan buat ida. Ikus mai husik kargu PM ne’e ema hotu la preokupa nia to’o agora nia mai iha Oecusse bele sukat ona nia kapasidade no ema hotu hahú preokupa fali nia.

Alkatiri mós haktuir katak, projetu bo’ot sira iha Oecusse ne’e la iha emprezáriu Timoroan ida mak iha kapasidade atu manan liu-liu ba nia familia, tanba tuir Alkatiri nia familia ida deit mak emprezáriu, maibé agora dadaun nia iha Atauro.

“Nia sei iha problema bo’ot kuandu ha’u ba Atauro karik agora Óbras Públika fó projetu Atauro tomak ba nia ema la koalia tanba nia makina hotu iha ne’ebá. Maibé bainhira ha’u iha ne’ebá mak projetu nia simu nafatin ema komesa koalia fali, ne’e realidade”, tenik Alkatiri. Nia

.