Independente - Ivonia Varela
Porta Voz husi Ekipa Integradu Ministériu Saúde, Vidal de Jesus Lopes hatete, relasiona ho públiku nia kestaun kona-ba ba ai-moruk stock out katak iha Nasional Farmasia Produtu Médiku (INFPM) dadaun ne’e pursentu 22 mak la iha.
“Iha INFPM semana kotuk iha ai-moruk pursentu 34 mak la iha maibé agora tun ona ba 22% tanba atualiza ona dadus iha ítem medikamentus balun ne’ebé tuir lolos la tama ka la uza ona iha merkadu tan ne’e tenki hasai tanba sira ne’e mak durante nee eziste hodi kontribui ba persentajem ba stock out nian” dehan Vidal liu husi Konferensia imprensa ne’ebé halao iha salaun INFPM Kampu Alor, Tersa (23/01).
Iha fatin hanesan, Diretór Ezekutivu Institutu Nasionál Farmásia Produtu Medikamentu (INFPM), Brigido Dias de Deus hatete, haree ba dadus sira ne'e komesa husi fulan-Janeiru mai konsege hamenus ona pursentu stock out ne'e tan ne'e hela 23% no hela oituan de'it atu tama ba normál.
"Agora dadaun ai-moruk lubuk ida mak iha ona dalan atu mai, inklui sasan ka ai-moruk husi kompaña Sali-magu hatama mai no sasan sira ne'ebé atu tama mai barak liu mak ai-moruk tan ne'e sei reduz númeru stock out ne'ebé mak iha hodi bele fila ba level normal," dehan Diretór Ezekutivu.
Diretór Dehan, ai-moruk sira ne'ebé iha dalan ona ne'e mai husi nasaun Indonézia.
Enkuantu, tuir informasaun ne’ebé mai husi Institutu Nasional Farmasia Produtu Medikamentu (INFPM) katak iha 25 to'o 27 fulan-Janeiru tinan 2024 kompanha Sali-magu sei hatama tan ai-moruk hamutuk kontainer haat. Enkuantu, ai-moruk hirak ne'e mai husi Nasaun Indonézia, Surabaya no Australia.
Sem comentários:
Enviar um comentário
Nota: só um membro deste blogue pode publicar um comentário.