“ESP Ainaro Eziji Promesa Governu”

.

Jornal Timor Post - Segunda, 19 Novembru 2012 

Eskola Sekundaria Publiku (ESP) Ainaro hein hela promesa ne’ebe mak eis Ministeriu Edukasaun iha IV Governu Konstitusional promete katak atu hadia eskola publiku ne’e maibe to’o agora la realiza. 

“Agora ESP Publiku Ainaro ne’e atu besik simu tan estudante foun maibe iha eskola refere sala la sufisiente no mos alunus sira nia estudante iha aula laran la hakmatek tanba agora atu tempo ona udan ida ne’e ami presiza governu nia atensaun tanba udan halo estudante sira preokupa ho aula neebe mak la seguru atu estuda,” hateten Direktor ESP Ainaro Alcino de Araujo ba TP tersa (13/11) iha nia knaar fatin. 

Alcino hateten, sira kontinua nafatin ba V Governu, liuliu Ministeriu edukasaun, tanba iha IV Governu liu husi ME deklara katak, sira sei hadia eskola refere, tanba eskola publiku iha Ainaro ida de’it, maibe realidade la realiza tanba ne’e sira husu governu koligasaun liu husi ME atu hadia eskola ne’e tuir imi nia promesa. 

Entertantu, preokupasaun hanesan hato’o mos husi estudante Fernanda Amelia de Araujo informa tan katak, sira hanesan estudante sente la dun kontenti tanba eskola ne’ebe mak agora sira utiliza sala la sufisiente inklui mos kalen dodok no la iha saneamentu no eskola ne’e rasik nia kondisaun la diak enkuantu iha tempu udan boot. 

.

“Lista Profesores Voluntariu Barak Falsu”

.

Jornal Timor Post - Kinta-feira, 11 Outubru 2012 

Hafoin Ministeriu Edukasaun ho Komisaun Funsaun Publika halo prosesu ba dokumentus profesores voluntariu iha profesores falsu barak. 

Tanba ne’e, Membru Parlamentu Nasional (PN) husi bancada FRETILIN, Paulo Moniz Maia husu ba Governu atu halo verifikasaun no revizaun klean ba lista naran profesores kuaze rihun tolu ne’ebe oras ne’e tama iha Komisaun Funsaun Publiku hodi prosesa sai funsionariu Permanente. 

 Deputadu ne’e deklara, tuir informasaun ne’ebe nia asesu husi edukasaun Distritu Bobonaro, iha professor falsu balun sira identifika durante ne’e lahanorin estudante sira, maibe naran tama iha lista profesores volontariu. “Informasaun ne’e hau rona husi edukasaun distritu Bobonaro, numeru klaru hau lahatene maibe atu hatene lolos tenki ba to’o Distritu,” dehan Paulo. 

 Relasiona ho problema ne’e, Paulo hateten, impede destinu professors volontariu barak ne’ebe durante tinan barak dedika an volontariu hodi hanorin estudante sira. 

Nia konsidera, problema ne’e akontese tamba failansu husi eskola ida-idak ne’ebe hatama lista naran professor sira nian ne’ebe iha ligasaun familiarismu, tanba ne’e, Governu presiza identifika lolos problema ne’e, atu nune’e profesores seluk labele sai vitima ba hahalok ne’e.

 “Balun la hanorin maibe tamba familia pronto tau naran hanesan volontariu paa sai funsionariu,” haktuir nia. 

.

TMR: Edukasaun La’o Loos Nasaun Mos La’o Loos

.

TEMPO SEMANAL - 24/09/2012

Timor Leste ninia edukasaun sei kudeik tan ba kualidade ne’ebe sei kiik tebes. Falta de kualidade ne’e mos influencia husi fator lubun ruma hanesan lingua ne’e konfundi, enviromentu, ekonomia no mos kualidade hanorin nain sira.

Presidenti da Republika Taur Matan Ruak ne’ebe hetan oportunidade hodi ko’alia ba participantes husi ministeiru edukasaun dehan nasaun la’o di’ak kuandu edukasaun mos iha kualidade. “Ita hotu hatene katak edukasaun importante tebes ba ita nia nasaun.

Dala ruma ita bo’ot sira la tau importancia servisu nunee foo impaktu la diak ba edukasaun. Ne’e labele,” Taur hateten. Presidenti da Republika ne’e ho oin seriu dehan problema bo’ot maka kualidade profesores sira nian presiza hadia liu husi sira nia prestasaun de servisu. “Dala ruma alunus sira matenek liu fali Profesores sira,” dehan Taur.

Xefe Estadu ne’ebe preokupadu tebes ho preparasaun jerasaun foun hodi simu tongkat lideransa iha futuru nasaun ne’e, husu ba professors sira atu hala’o sira nia kna’ar ho didiak no maka’as liu tan atu bele foo hakat ba nasaun Timor Leste.

Hatan ba lian sadik Presidenti Ruak ninian ne’e Ministru Edukasaun, Bendito Freitas dehan, “Tan hotu-hotu hanesan hetan camadu atu partisipa. Tan ita hotu-hotu tenke kontribui ba dezenvolvimentu edukasaun iha Timor Leste. Ohin presidenti da Republika rasik hateten katak Ministeiru ida ne’e servidu importante tebtebes hodi halo ema sai ema. Katak forna ema, eduka ema para atu sai lider ba futuru jerasaun no responsabel ba ita nia rain.

Tan ida ne’e servisu ida kee ho dezafius boot tebtebes iha ministeiru ida kee iha departamentus barak tebtebes ne’e atu bele iha koordenasaun nee importante.

 Atu bele kreia mekanizmu de komunikasaun ida, atu ba oin ne’e bele la’o diak liu tan iha koordenasaun de programa no sira nia implementasaun bele lao diak liu. Ministru Bendito indika atu hetan uniforme iha kualidade de servisu, ninia parte presiza resolve problema koordenasaun de programas no implementasaun.

“Hanesan Ministeiru edukasaun ha’u hanoin katak importante tebtebes maka partisipasaun aktivu dos fungsionariu publiku hodi dezenvolve setor edukasaun iha Timor leste.

” Sorumutuk iha centru konvensaun Dili (24/09) lokraik ne'e, hetan partisipasaun wain husi fungsionarius iha Ministeiru Edukasaun no reuniaun ne’e loke husi banda muzika bandu ne’e eskolante sira toka ho lian furak tebes.

.

Mericio Akara: "Estadu Abandona Labarik Bele Hamout Futuru Nasaun Entre Riku No Kiak"

.

Jornal Independente - Tersa-feira, 11 Setembru 2012

Diretor Organizasaun ONG Luta Hamutuk, Mericio Akara, dehan, estadu Timor Leste tenki hanoin dook hodi investe makaas ba labarik sira, tanba distinu rai ne'e iha sira nia liman.

Tuir Akara katak, distinu rai ne'e la mate deít iha jerasaun 75 nia liman, maibe sei iha kontuinidade.

Nia hatutan, loloos labarik sira labele abandona sira nia eskola hanesan akontese agora dadaun, tanba konstituisaun RDTL fo garantia ba sira atu hetan fasilidade hodi aprende.

"Se la kria kondisaun diak, ita mak hakoi Timor, iha kontestu investe iha ema para aban bain rua lori nasaun ne'e ba oin," dehan Akara iha nia knar fatin, Farol, (10/9).

Akara dehan, Estadu mos tenke hare ba injustisa ne'ebe mak agora akontese ba labarik sira entre ema riku no ema kiak, tamba, ema riku no ema boot nia oan, iha eskola ida ne'ebe diak, balun ba estranjeiru maibe ema kiak nia oan kontinua eskola iha eskola ne'ebe laiha kondisaun.

Kestaun ne'e, Tuir Akara, injustisa boot ba ema kiak nia oan, tamba konstituisaun RDTL hateten Timor oan hotu-hotu iha direitu atu hetan fasilidade ba edukasaun ne'ebe diak.

"Labele husik balun abandona (terlantar), balun hetan previlejio, ida ne'e ita promove injustica sosial," deklara diretor ne'e.

Se ida ne'e kontinua akontese, tuir nia, sei akontese kecemburuan sosial, tanba ema ne'ebe riku sei riku ba beibeik, no ema ne'ebe kiak sei kiak nafatin.
.