Luta Hamutuk: "KKN Mosu Iha Projetu veteranus"

.

Jornal Independente - Tersa-feira, 11 Setembru 2012

Primeiru Ministru Kay Rala xanana Gusmao iha ona hanoin diak atu bele hadiak veteranu sira nia kondisaun moris liu husi fahe projetu, maibe hamosu fali aktu Korupsaun Kolusaun no Nepotismu (KKN) iha projeitu ne'e.

Sosiedade sivil, deputadu parlamentu nasional no veteranu sira balun konsidera fahe projeitu laós atu fo benefisiu ba veteranu sira, maibe hamosu veteranu falsu hodi habokur ema seluk.

Tuir Diretur ezekutivu ONG Luta Hamutuk Mericio Akara hatete, fahe projeitu ba veteranus laos atu aselera dezenvolvimentu, maibe atu haburas KKN, habokur kompania nain (sub kontrator), tristeza boot veteranu kontinua kiak no povu la sente rejultadu implementasaun projeitu husi programa governu neé.

"Fahe projeitu nufin la aselera dezenvolvimentu iha ne'ebe iha mak kualidade la diak, iha mak KKN buras, iha mak diretores ho kompania sira mak fahe projeitu sira ne'e, povu baibain la senti rejultadu implementasaun," dehan Akara ba INDEPENDENTE horseik hodi responde deklarasaun Primeiru Ministru Xanana Gusmao katak, nia fahe projetu ba veteranus tanba atu hadiak veteranus sira nia kondisaun moris.

Politika Ptimeiru Ministru Xanana Gusmao ne'e, laos ajuda veteranus tanba kompani husi rai liur mak aproveita hodi habokur an.

"Durante ne'e dala barak Governu fahe projeitu hanesan, Pakote Referendum, PDD I no PDD II, nune'e mos la aselera prosesu dezenvolvimentu ida, nafatin marka pasu, ita bele haree pakote referendum nia rejultadu iha ne'ebe," dehan Akara.

Tuir Estudu ne'ebe mak Luta Hamutuk halo, kada tinan projetu sira ne'ebe mak liu husi aprovizionamentu maioria pursentu 60 failla iha falan no pursentu 40 mak ezekuta.

ne'e hatudu, laos sistema aprovizionamentu mak lalos, maibe impelemntador sistema mak uza sala tamba KKN.

Tanba ne'e, Akara dehan, dezenvolvimentu la lao, laos impaktu husi lei hanesan tenderizasaun maibe kapasidade implementador sira mak seidauk sufisiente.

Ba kestaun ne'e, antes ne'e mos, Prezidenti Komisaun E trata asuntu infraestrutura no komunikasaun iha Parlamentu Nasional, Pedro da Costa, rekoinese katak, durante implementasaun projeitu eletrisidade ba veteranus, sira identifika laiha kualidade, maibe governu esforsu nafatin atu hadia iha futuru hodi atinji kualidade.
.

Mericio Akara: "Estadu Abandona Labarik Bele Hamout Futuru Nasaun Entre Riku No Kiak"

.

Jornal Independente - Tersa-feira, 11 Setembru 2012

Diretor Organizasaun ONG Luta Hamutuk, Mericio Akara, dehan, estadu Timor Leste tenki hanoin dook hodi investe makaas ba labarik sira, tanba distinu rai ne'e iha sira nia liman.

Tuir Akara katak, distinu rai ne'e la mate deít iha jerasaun 75 nia liman, maibe sei iha kontuinidade.

Nia hatutan, loloos labarik sira labele abandona sira nia eskola hanesan akontese agora dadaun, tanba konstituisaun RDTL fo garantia ba sira atu hetan fasilidade hodi aprende.

"Se la kria kondisaun diak, ita mak hakoi Timor, iha kontestu investe iha ema para aban bain rua lori nasaun ne'e ba oin," dehan Akara iha nia knar fatin, Farol, (10/9).

Akara dehan, Estadu mos tenke hare ba injustisa ne'ebe mak agora akontese ba labarik sira entre ema riku no ema kiak, tamba, ema riku no ema boot nia oan, iha eskola ida ne'ebe diak, balun ba estranjeiru maibe ema kiak nia oan kontinua eskola iha eskola ne'ebe laiha kondisaun.

Kestaun ne'e, Tuir Akara, injustisa boot ba ema kiak nia oan, tamba konstituisaun RDTL hateten Timor oan hotu-hotu iha direitu atu hetan fasilidade ba edukasaun ne'ebe diak.

"Labele husik balun abandona (terlantar), balun hetan previlejio, ida ne'e ita promove injustica sosial," deklara diretor ne'e.

Se ida ne'e kontinua akontese, tuir nia, sei akontese kecemburuan sosial, tanba ema ne'ebe riku sei riku ba beibeik, no ema ne'ebe kiak sei kiak nafatin.
.