Governu Hamosu Diskriminasaun; "Uma Hitu Simu Ajudus, Uma Tolu Seidauk"

.

Jornal Timor Post - Kuarta-feira, 12 Setembru 2012

Vitima uma tolu husi akontesementu ahi haan uma, iha area eis pasar sengol, Bidau akaderuhun to'o agora seidauk hetan ajudus emerjensia husi Governu, maibe familia hitu mak hetan ona ajudus emerjensia.

"Ami uma hitu mak hetan ona, sira uma tolu seidauk hetan apoiu emerjensia, ami husu tau matan hotu, tamba ne'e laos ami nia hakarak, buat ne'e hanesan akontesementu derepenti," hateten uma nain januario Sebastiao da Silva ba Timor Post, Tersa (11/9), iha nia uma ahi haan fatin Bidau, Dili.

Komunidade sira ne'ebe maka ahi haan sira nia uma mesak negosiante, tanba ne'e governu kompotente atu ajuda lalais material uma nian para hadiak hikas fali fatin negosiu.

"Ami husu ba estadu para ajuda material halo uma para ami bele halao fali moris nuudar negosiante, tanba ami laos empregadu," dehan Sebastiao.

Relasiona ho ajudu hahan foos saka ida ba komunidade, ne'ebe familia ida hetan saka ida, uma nain lamenta tebes tanba governu fo foos ne'ebe maka la merese ba ema atu haan.

"Foos ida ne'e hodi fo han fahi, tanba lahuk, iis no kinur hotu, uluk tempu rezistensia ami fo han ba luta nain sira iha ai-laran ami fo foos diak laos fo foos aat ida hanesan agora governu fo mai," Sebastiao hateten..

Tuir observasaun jornalista iha fatin ahi haan, oras ne'e dadaun komunidade komesa hamoos fali ahi anar no balun komesa harii hikas fali fatin negosiu nian.

.

Adriano do Nascimento: "Governu Sei Aprejenta Orsamentu Retifikativu US$ Millaun 50"

.

Notisia Husi TVTL - Tersa-Kalan, 11 Setembru 2012

Governu sei aprejenta orsamentu retifikativu ba Parlamentu Nasional (PN) iha semana ne’e nia laran, total orsamentu retifikativu ba tina ida ne’e hamutuk dollar Amerikanu milaun lima nolu.

Informasaun ida ne’e hato’o husi Vice Prezidenti Parlamentu Nasional (PN) Adriano do Nascimento ba TVTL iha uma fukun Parlamentu Nasional Terca-feira ne’e.

Tuir Adriano katak, bazeia ba informasaun ne’ebe maka iha, Governu sei aprejenta orsamentu retifikativu ba periodu 2012 iha semana ida ne’e nia laran homontante Dolar Amerikanu milaun lima nolu.

"Hau hanoin iha tempo badak, ami simu hotu ona proposta orsamentu retifikativu," dehan Adriano.

Deputado tersera lejislatura ne’e salinete liu tan katak, rajaun Governu atu aprejenta orsamentu retifikativu refere atamba atu bele fasilita serviso no uza hodi selu Gabinete Ministru no Sekretariu foun ne’ebe estabelese iha kintu Governu Konstitusional.

"Depois de eleisaun, Governu foun ida ne’e loke inisiativu foun mos dirasaun foun, nune’e mos iha nia pesoal, ami fiar katak deputadu liu-liu iha koligasaun sei aprova orsamentu ne’e atu fasilita roda aktividade governu ida ne’e nian," dehan Adriano.

Entertantu, Tuir dadus ne’ebe lansa husi organizasaun Luta Hamutuk katak, husi orsamentu jeral Estadu 2012 ho total milaun ida resin, Governu foin maka ezekuta pursentu 40, tamba ne’e, bazeia ba relatoriu refere tuir lolos governu la presiza husu tan orsamentu retifikativu, maibe bele uza osan restu husi orsamentu Jeral Estadu 2012 ne’ebe aloka ba verva refere.

.

Iregularidade Iha Pagamentu: "PM Xanana Deadline Membru Governu Aprezenta Lista Funsinariu Publiku"

.

Jornal Nacional Diario - Kuarta-feira, 05 Setembru 2012

Primeiru Ministru (PM) Xanana Gusmao fo deadline loron 3 ba membrus do Governu ida-idak atu aprezenta lista Funsionariu Publiku (FP) ba pay roll Ministeriu financas, tanba durante ne'e mosu iregularidade barak akontese iha pagamentu ba Funsionariu publiku sira.

"Hau husu ba membru Governu sira hatama lista funsionariu publiku sira nia para labele ulun fatuk moras," dehan PM xanana iha Ministeriu Financas, tersa (4/9), bainhira halo inkontru ho membru V Governu konstitusional kona ba asuntu pagamentu ba funsionariu publiku sira nebe mosu iregularidade.

Chefe Governu ne'e dehan tan, as vez funsionariu publiku hamutuk ema nain 28.000, maibe Ministeriu Financas selu deit mak ema nain 26.000, problema ne'e laos husi Ministeriu financas maibe husi kada Ministeriu mak la kontrola sira nia funsionariu ho diak.

Ba probelam ne'e, Primeiru Ministru Xanana Gusmao husu atu kada Ministeriu haree didiak sira nia funsionariu para hatama ba payroll Ministeriu Financas nian, atu labele ulun fatuk moras no la hetan reklamasaun husi funsionariu publiku sira tomak.

.