“EUA Hakarak Timor-Leste Moos Husi Korupsaun”

.

Jornal Independente - Sesta-feira, 07 Setembru 2012

Estadus Unidus Amerika (EUA) hakarak Timor-Leste sai nasaun numeru um (1) ba tansparante no moos husi korupsaun iha reijaun ASIA.

"Hau rekomenda ba Governu, atu Timor Leste bele sai nasaun Primpeiru iha ASIA ne'ebe trasparante liu,"dehan Hillary Klinton iha konferensia da imprensa hafoin hasoru malu hon Primeiru Ministru xanana Gusmao iha palasiu Governu, Kinta (6/9).

Hillary mos hatutan, EUA nuudar nasaun ida ne'ebe iha poder liu iha mundu, hakarak hametin liutan relasaun bilateral ho nasaun foun Timor Leste.

Area rua mak nasaun rua ne'e hakarak sevisu hamutuk, hanesan, Kooperasaun militar, ajuda iha seitor justica, saude, agrikultura, hodi ajuda Timor leste sai nasaun ida forte no dezenvolve liu tan.

"Hau nia mensazen ba povu Timor Leste maka, EUA uluk hamutuk tiha ona ho imi durante imi luta ba Independensia, no agora ami hamutuk nafatin ho imi atu servisu hodi dezenvolve liu tan demokrasia ida ne'ebe forte, reforma instituisaun, lei sira no proteze Timor oan nia direitu," dehan Hillary Clinton.

.

Hari'i ITI, EUA Prontu Fo Suporta Legal: “PM Xanana: Laos Tempo Hateke Ba Kotuk”

.

Jornal Nacional Diario - Sesta-feira, 07 Setembru 2012

Hari'i Tribunal Internasional hodi julga autor krime grave iha tempu pasadu, Estadus Unidus Amerika (EUA) pronto fo legal suporta ba Timor Leste.

Ministru dos Negosius Estranjeirus Estadu Unidus Amerika, Hillary Klinton hato'o lia hirak ne'e, wainhira hataan perguntas Jornalista sira kona ba julgamentu ba autor krimes graves iha Timor Leste iha tempo pasadu.

"Estadus Unidus Amerika pronto fo legal suporta ba violensia domestika, trafiku humanus inklui violasaun direitus umanus iha tempo pasadu," dehan Hillary Klinton, hafoin enkontru ho Primeiru Ministru xanana Gusmao iha palasiu Governu.

Preokupasaun, Ministra dos Negosiu Estranjeirus, Hillary Clinton nian ne'e, Primeiru Ministru Xanana Gusmao hateten laos tempo ba Timor Leste atu hateke ba pasadu, maibe oinsa hametin relasaun ho Indonezia hodi kria paz no amizade hodi bele kontribui ba dezenvolvimentu iha Timor Leste.

Primeiru Ministru xanana Gusmao mos hato'o obrigado ba komprensaun lideransa Estadus Unidus Amerika ne'e, maibe tuir PM xanana, ohin loron Timor Leste ho Indonezia harii ona komisaun Verade no amizade hodi haree ba kestaun ne'e.

.

“Hillary Promete Apoiu U$6 Milloens”

.

Jornal Timor Post - Sesta-feira, 07 Setembru 2012

Sekretaria Estadus Unidus Amerika relasaun externa, Hillary Klinton, promete Estadus Unidus Amerika sei apoiu osan U$6 milloens liu atu ajuda fo bolss estudus ba joven Timor-oan hodi ba estuda iha nasaun Amerika.

Intensaun apoiu ne'e atu dezenvolve kapasidade Timor-oan atu ba hetan matenek no wainhira remata estudus sei fila mai Timor leste hodi hadia futuru nasaun ba povu nia moris diak.

Hafoin hasoru malu ho Xefi Governu Kay Rala xanana Gusmao, Hillary hateten, nia orgullu tanba primeira vez nia reprezenta Estadus Unidus Amerika mai Vizita Timor-Leste, tan ne'e, nia husu ba lideransa sira katak, Timor Leste atu sai diak tenki iha koperasaun diak ho nasaun boot sira atu nuneé bele tulun malu.

"Buat importante ne'ebe sai prioridade husi ami no ami garante ba imi nia joven Timor Leste atu muda sira nia vida ne'ebe hetan potensia liu husi Maromak, iha ema pursentu 60 populasaun (60%), liu-liu sira neébe iha tinan 25 mai kraik hau hasoru sira iha dalan, mesak estudante diak deít," Hillary haktuir liu husi konferensia ba imprensa iha palasiu Governu, Kinta (06/09).

Hillary mos fo mensazen ba povu Timor Leste tomak katak, estadus Unidus Amerika orgullu hamrik ho Timor Leste dezde luta to'o ukun rasik an, tan ne'e sira sei hamrik nafatin ho TL hodi servisu hamutuk atu hari demokrasia ne''be forte ho instituisaun global bazeia ba lei no orden atu proteze diretu sidadaun ida-idak nian.

"Demokrasia ne'ebe metin hatudu husi ita nia pratika loro-loron entre ita nia relasaun diak ho vizinu no parseiru sira, ne'e razaun ida, tamba estadus unidus Amerika hare ba demokrasia no diretus humanus hanesan pilar importante iha ASEAN," nia esklarese.

Hillary rekomenda ba governu atu, Timor Leste nuudar nasaun primeiru iha Azia no terseiru iha Mundo kona ba Transparansia.

.

Evita Veneno: “Protokolu Hillary Hasai Agua Iha Konferensia”

.

Jornal Timor Post - Sesta-feira, 07 Setembru 2012

Protokolu Sekretaria estadu Unidus Amerika Relasaun Externa, Hillary Clinton hasai Agua (bee) ne'ebe prepara husi Protokolu Gabinete Primeiru Ministru tanba tauk Veneno (racun) ruma iha agua no kopu laran.

Tuir observasaun Diariu ne'e hatudu iha Palasiu Governu, Kinta (06/9), antes oras ida Hillary to'o iha Palasiu, ekipa Protokolu husi Gabinete Primeiru Ministru halo preparasaun ba fatin konferensia imprensa.

Maibe, molok minutu 30, delegasaun ne'e to'o derepenti ekipa protokolu husi Embaixada Estadus Unidus Amerika iha Timor Leste to'o Palasiu Governu hodi haree preparasaun ba fatin konferensia nian.

Nune'e, ekipa protokolu husi Embaixada Estadus Unidus ne'e hasai hotu kopu inklui agua ne'ebe prepara ona ba iha Primeiru Ministru xanana Gusmao nia fatin no Sekretariu Estadu estadus Unidus Amerika, Hillary Klinton.

Ho serviso husi protokolu Amerika ne'e, halo Jornalista inklui Timor oan sira ne'ebe iha sala konferensia sente konfuzaun tanba ho razaun saida maka tenki hasai agua no kopu ne'ebe prepara ona iha meza leten.

Maibe, tuir informasaun husi fonte balun katak, asaun husi Protokolu Hillary ne'e akontese beibeik ona, ho intensaun atu evita karik ema balun tau aimoruk (racun-red) iha kopu ne'ebe prepara ba sira nia lideransa nasaun.

Aleinde hasai kopu no agua, diariu ne'e mos observa katak, protokolu husi delegasaun refere lori kedas agua no kopu husi sira nia servisu fatin hodi troka kopu ne'ebe prepara ona husi protokolu Gabinete Primeiru Ministro.

.