“Siklismu sa’e foho hanesan desportu ida, maibé bele moos fasilita kontaktu ho natureza no kontaktu ho populasaun”

.

Gabinete do Primeiro-Ministro - Facebook

Iha Domingo 17 de Maiu de 2015, tuku 4 lorokraik, Primeiru-Ministru he’an bisikleta liu husi Bekari, Dolak-oan, Hera no fila mai Dili liu husi Fatu-ahi.

Iha rota ne’e, para alein de halo desportu, Primeiru-Ministru moos halo kontaktu ho agrikultor sira iha Hera. Iha kontaktu ne’e, Priemiru-Ministru ko’alia diretamente ho jovem nain 4 ne’ebé kuda hela kanku iha kabubu lubun ida.

Husi konversa ne’e, Primeiru-Ministru hetan informasaun katak, jovem sira ne’e universitariu UNTL-nian iha área Kimika, iha ona 3º Semestre, no iha fim de semana sira aluga ema nia rain, kuda kanku, hafoin fahe rezultadu ho ema rai-nain.

Kanku kabubu ida, sira bele hetan total US$150-US$200. Jovem estudante hirak ne’e, sira nia inan-aman iha foho (Viqueque no Baucau) no sira halo esforsu atu hetan osan adisionál hodi sustenta sira nia estudus.

Haree ba espiritu inisiativa no sakrifisiu jovem hirak ne’e nain, Primeiru Ministru hateten:

“Ema barak hateten katak jovem sira agora lakohi servisu iha to’os no natar, maibé jovem hirak ne’e, hatudu katak sira balun sei hakarak servisu iha natar no to’os atu hatutan sira nia moris. Governu tenki halo barak liu tan atu apoiu agrikultura, liu-liu ba jovem sira.”

Wainhira fila liu husi Fatu-ahi, nato’on loos ho momento loron monu dadaun. Fatin iha Fatu-ahi furak tebes atu asisti loron monu, ho cidade kapital Dili hanesan front-ground.

Primeiru Ministru hateten: “Iha ne’e bele tau kafé ka restaurante ruma atu ema bele apresia por do sol, enquanto hemu kafé ka han refeisaun ruma ho ida-idak nia família.”

-GPM

(Foto: Media GPM)

.