LERE LA KONKORDA PR TAUR NIA DESIZAUN

,

Timor Post - 18 de abril de 2016~

DILI—Xefe Estadu Maior Jenerál FALINTIL-Forsa Defeza Timor-Leste (F-FDTL), Maijór Jenerál Lere Anan Timur, la konkorda ho desizaun Prezidente Repúblika (PR), Taur Matan Ruak nia ezonorasaun hodi foti fali Koronel Pedro Klamar Fuik ba Xefe  Estadu no Coliaty ba Vise Xefe  Estadu.   

                                         

“Reformasaun ne’ebé maka fó mai ami veteranu la ho dignu. Ami hanesan fali kriminozu ida ne’ebé nia tenki hasees ami hosi instituisaun. Maibé, ami nia Maun Boot Kay-Rala Xanana Gusmão sei moris nia ba ona serbisu, sé fila ami sei aprezenta ami nia situasaun ida ne’e,” dehan Lere ba jornalista sira iha nia rezidénsia Farol, Sábadu (16/4).

Nia hatutan katak sira seidauk dehan atu simu ka la simu desizaun Prezidente  Taur nian ne’e, bainhira sira nia Maun Boot Xanana seidauk fó esklaresementu ruma ba sira.

“La’ós katak ha’u sai jenerál ne’e jenerál nafatin ou ha’u nia alin sira koronel ne’e koronel nafatin. Tempu to’o ona ema bolu katak ami boot ona, ema jenerál Indonézia sira koñese ami, koñese ha’u, ne’e tanba ami nia dignidade nu’udar veteranu. Ami hatete  ba juventudi tomak katak ami seidauk bele simu desizaun Prezidente  Repúblika, Taur Matan Ruak,” Lere tenik.

Nia esklarese katak kuandu Maun Xanana fila nia tenki rezolve problema ne’e. Nu’udar military, nia informa, sira rekoñese Taur Matan Ruak hanesan prezidente  repúblika no komandante supreme forsas armadas no nu’udar veteranu rekñese Xanana hanesan sira nia maun, mestre no komandante en-xefe .

Maibé, nia husu ba Forsas Armadas no Polísia Nasionál Timor-Leste (PNTL) túr hakmatek no nia kontenti bainhira sai hosi militár.

Lere haktuir iha ailaran, nia ho Taur laiha problema. Sira só problema kontrola kilat musan de’it, maibé Taur, Xanana ho Saudozu Konis maka iha problema.

“Ita hatene katak Pedro Klamar Fuik maka troka ha’u haksoit ba Fitun rua ne’e problema ida. Tuir mai maka Coliaty, prezidente  konfia ne’e maka tau nia. Ha’u rona prezidente  la konfia ha’u. Ha’u ida uluk ita rua han hamutuk no mate hamutuk o la konfia maibé laiha buat ida,” Lere lamenta.

Nia salienta katak nia sai ba ona vida polítika. Nia sei ko’alia polítika laiha ema ida maka atu taka nia ibun, maibé nia la temi atu ba partidu ida ne’ebé.

Antes ne’e, tuir fonte konfirmadu iha Palásiu prezidensiál dehan prezidente hili ona opsaun foun ne’ebé maka governu hato’o hosi proposta rua; ida mantein ho proposta tuan kontinua ho xefe  Estadu Maior Jenerál, Maijór Jenerál Lere Anan Timor no ida fali opsaun foun, PR hili opsaun foun ne’e.

“Opsaun foun ne’e maka Pedro Klamar Fuik ba Xefe  Estadu Maior Jenerál, ho Coliaty ba Vise Xefe  Estadu Maior, Brigadeiru Jenerál,” dehan fonte ne’e.

Tuir informasaun ne’ebé  maka diariu ne’e hetan katak, Xefe  Estadu Maior Jenerál, Maijór Jenerál Lere Anan Timor hetan promosaun ba Tenente Jenerál no Brigadeiru Jeneraá Filomeno Paixão promove ba Maijór Jenerál, ho Koronel Falur Rate Laek promove ba Brigadeiru Jenerál maibé laiha kargu. (way) 

.