Konis Santana Laos Heroi Deit Ba FRETILIN; “Timor Oan Hotu La Nega FRETILIN Lori Rai Ne’e Ba Independensia”

.

Jornal Nacional Diario - Kuarta-feira, 17 Outubru 2012

Xefi Bancada CNRT, Natalino dos Santos, hateten katak, saudozo Nino Konis Santana laos Heroi deit ba Partidu FRERTILIN, maibe heroi boot ba povu tomak iha Timor Leste.

 “Hau aseita katak, Konis Santana hanesan heroi ba Povu Timor tomak no mos bele hateten katak, lideransa maximu FRETILIN nian, ida ne’e hanesan Honra boot ida,” sublinha Natalino ba JNDiario, Tersa (16/10) iha Parlamentu Nasional.

Nia dehan, Nino Konis Santana nudar herois boot ida iha istoria Timor Leste nian, tanba ne’e, estadu iha dever moral atu tau nia ho dignu iha fatin heroi nian.

Tuir Natalino, ema hotu tenki respeita prosesu ida ne’e, nune’e, nia mos apoiu Saudozo Nino Konis Santana tenki lori ba Comite Central FRETILIN (CCF) hafoin entrega ba estadu.

 Natalina relembra katak, ema iha Timor ne’e nunka mais nega FRETILIN ida ne’ebe lori rai ne’e ba independensia. Iha fatin hanesan, deputadu Ealdio Faculto husi bancada FRETILIN mos hateten katak, ruin Konis Santana tenki liu duni husi CCF, tanba nia hanesan heroi FRETILIN ne’ebe fo nia vida timak ba nasaun doben ida ne’e ni independensia.

 Antes ne’e, mos Prezidenti partidu FRETILIN, Francisco Guterres ‘Lu-Olo’ rekomenda ba familia saudozu Nino Konis Santana atu antes entrega ruin ba estadu tenki liu uluk husi Partidu FRETILIN.

.

Governu Sei Estabelese Konsellu Kombatentes: "Osorio Florindo: Lei Iha Ona Maibe Governu Maka La Ezekuta"

.

Jornal Nacional Diario - Sesta-feira, 14 Setembru 2012

Primeiru Ministru Kay Rala xanana Gusmao hateten, iha V Governu Konstitusional ne'e sei reviu lei kona ba estatutu Libertasaun nasional hodi hari'i konsellu kombatentes atu sai salva guarda kredibilidade iha verifikasaun dadus.

"Ami sei reve lei kona ba estatutu kombatentes libertasaun nasional no sei estabelese konsellu kombatentes hahu husi distritu hodi salva duarda kredibilidade iha verifikasaun no validasaun ba rejistu no finalizasaun prosesu sira ne'ebe hetan reklamasaun ka kontestasaun," dehan PM Xanana Gusmao iha nia diskursu iha PN Kuarta (12/9), bainhira aprezenta programa V Governu nian.

Ba kestaun ne'e, Deputadu husi Bancada FRETILIN Osorio Florindo, ne'ebe levanta kona ba kestaun veteranus nia katak, koalia kona ba veteranus nia vida, lei Parlamentu II Legislatura aprova atu kria konsellu veteranus, maibe PM mak la ezekuta ida.

"PM mak la konsege hari'i konsellu Veteranus, ida ne'e ema hotu hein hodi hadia dadus veteranus ne'ebe falsu ne'e," tenik nia.

Nune'e, deputada husi Bancada CNRT Domingas Alves 'Bilou-Mali' hateten prosesu konsellu antigus kombatentes la'o hela to'o agora.

"Ita haree iha programa ne'e, Governu sei fo nia preokupasaun nafatin ba veteranus oinsa para rezolve problema veteranus nian," esplika deputada ne'e.

Iha debate ne'e, Bancada FRETILIN kestiaona makaas kona ba tempu ne'ebe kada deputadu sira uza halo apresiasaun, tuir sira katak, tempu ne'e limitadu tebes, maibe prezidenti esklarese katak, tempu ne'e giaun maka manda ne'ebe klaru katak, deputadu ida-idak hetan nia jata minutu 8 i tempu ne'e la soke rejimentu parlamentu.

.

"Alkatiri Rekonese Xanana Famozu Liu Nia"

.

Jornal Independente - Kinta-feira, 13 Setembru 2012

Sekretariu Jeral Partidu FRETILIN, Mari Alkatiri rekonese katak, Xanana Gusmao famozu liu iha Timor, tanba, rezustamentu ne'ebe mak FRETILIN halo, militante FRETILIN barak mak hakarak vota ba Xanana duke Vota ba FRETILIN.

"ITa halo rejustamentu bar-barak, ita esplika, esplika mas ema barak komesa hanoin Xanana mos hanesan ita (FRETILIN), hateten ami vota ba Xanana ami la vota ba CNRT, ne'e ita FRETILIN nia ema duni maka hanesan ne'e," dehan Mari Alkatiri iha Sede Comite Central FRETILIN (CCF), foin lalais ne'e.

Nia hatutan, tuir lista eskrita militante Fretiliza nian liu rihun 160, ne'e duni, kuandu militante ida lori ema ida tan bele lori FRETILIN hetan maioria absoluta, maibe, realidade la'o oin seluk.

"Ne'e tamba laiha militante konxiente no laiha kuadru konxiente hodi lori partidu ba oin.

Alkatiri mos informa, realidade ne'ebe FRETILIN hasoru, husu ba militante tomak, liuliu estrutura partidu atu labele fo sala ba malu, maibe oinsa atu deskobre failansu ne'ebe maka iha no kontinua hakat ba oin.

,

“CNRT-PD 'Kontra' Ideia Prezidenti PN”

.

Jornal Timor Post - Kinta-feira, 06 Setembru 2012

Bancada CNRT no Bancada PD kontra maka'as ideia Prezidenti Parlamentu nasional (PN), Vicente Guterres, atu harii orgaun permanente ida tan atu kontrola Estadu husi titular orgaun soberania sira to'o membru Superior administrasaun publiku tomak.

Ideia Vicente nian ne'e ho razaun hanesan alternativa ida atu salva osan Estadu nian no fo moris diak ba povu tomak.

Maske Nuneé bancada CNRT no PD kontra maka'as ideia ne'e.

Xefe bancada CNRT natalino dos santos hateten, atu kontrola ba orgaun administrativa, Parlamentu nasional (PN) nu'udar orgaun fiskalizador, tuir mandatu artigu 92, agora V Governu estabelese tan Sekretariu estadu Fortalesmentu Instituisaun, oinsa atu haree lalaok administrasaun no birokrasia ne'ebe iha.

"Tan ne'e agora atu harii tan orgaun foun ida, tenke iha lei ida, maibe agora ita nia lei la primiti atu harii tan orgaun foun ida, atu kontrola Administrasaun estadu inklui kontrola administrasaun," hateten natalino ba Timor Post iha PN, kuarta (05/9).

Tan ne'e, Tuir Natalino katak, se hakarak atu harii tan orgaun permanente ida, depende ba lei atu deside, nesesidade ou lae, no atu fiskalizasaun lao diak liu tan, estadu tenki fo kapasitasaun mazimu ba PGR, PDHJ, KAK, Polisia no garantia lei ida forte, para sira bele implementa.

Entertantu Xefe bancada PD, Maria Lurdes Martins de Sousa Bessa, hateten, nia parte seidauk hatene loloos estetimentu husi Prezidenti parlamentu Nasional, ho ida ne'e nia seidauk bele hato'o pontu de vista.

Maibe, dehan Maria, iha lei buat hotu bele, depende ba rezolusaun, mai husi Governu ou parlamentu nasional hodi halo dekreitu lei foun, mai ita tenki hanoin didiak ho ninia justifikasaun hodi hatene didiak kontiudu.

.