Misaun ONU Remata; “Lu-Olo Husu Timor Oan Prepara An”

.

Jornal Timor Post - Kinta-feira, 18 Outubru 2012 

Eis Titular, Francisco Guterres Lu-Olo, Atual Prezidenti partidu FRETILIN, husu ba Timor oan hotu hakbi’it an para kontribui ba dezenvolvimentu nasional, wainhira Nasoens Unidas remata nia misaun iha Timor Leste. 

 “Misaun Nasoens Unidas nian sei hotu iha tempu badak nia laran, prekupasaun ami nian partikularmente husi FRETILIN ninian maka’as tebes, misaun ne’e bele hotu, para bele fob a Timor oan sira, ita hotu bele hola ita nia kbi’it tomak, hodi hari’i ita nia estadu no dezenvolvimentu ita nia rain,” dehan Lu-Olo ba Jornalista sira hafoin remata primeiru sesaun debate espesialidade orsamentu retifikativu 2012, iha Parlamentu Nasional (15/10). 

Lu-Olo rekoinese, ONU ajuda ona Timor oan iha aspeitu barak, maibe hakarak ka lakohi iha momentu ne’ebe nia tempo to’o ona tenki husik no Timor oan sira kaer rasik nia kuda talin mesak, hodi halo dezenvolvimentu nasional iha nia nasaun rasik. 

Iha oportunidade ne’e, Lu-Olo apela ba povu tomak, atu assume responsablidade hodi garante paz no estabilidade tanba, wainhira Timor oan sei kontinua kria instabilidade maka sei fo impresaun ba mundu katak, Timor Leste seidauk bele garante ka seidauk bele para atu hamrik mesak. 

Lu-Olo mos husu ba instituisaun Estadu nian, liuliu Polisia Nasional Timor Leste (PNTL) atu hola knaar ho professional hodi hatuur lei no orden, atu nune’e sidadaun hotu senti seguru ba sira nia an rasik, no mos ba sira nia riku soin. 

.

Konis Santana Laos Heroi Deit Ba FRETILIN; “Timor Oan Hotu La Nega FRETILIN Lori Rai Ne’e Ba Independensia”

.

Jornal Nacional Diario - Kuarta-feira, 17 Outubru 2012

Xefi Bancada CNRT, Natalino dos Santos, hateten katak, saudozo Nino Konis Santana laos Heroi deit ba Partidu FRERTILIN, maibe heroi boot ba povu tomak iha Timor Leste.

 “Hau aseita katak, Konis Santana hanesan heroi ba Povu Timor tomak no mos bele hateten katak, lideransa maximu FRETILIN nian, ida ne’e hanesan Honra boot ida,” sublinha Natalino ba JNDiario, Tersa (16/10) iha Parlamentu Nasional.

Nia dehan, Nino Konis Santana nudar herois boot ida iha istoria Timor Leste nian, tanba ne’e, estadu iha dever moral atu tau nia ho dignu iha fatin heroi nian.

Tuir Natalino, ema hotu tenki respeita prosesu ida ne’e, nune’e, nia mos apoiu Saudozo Nino Konis Santana tenki lori ba Comite Central FRETILIN (CCF) hafoin entrega ba estadu.

 Natalina relembra katak, ema iha Timor ne’e nunka mais nega FRETILIN ida ne’ebe lori rai ne’e ba independensia. Iha fatin hanesan, deputadu Ealdio Faculto husi bancada FRETILIN mos hateten katak, ruin Konis Santana tenki liu duni husi CCF, tanba nia hanesan heroi FRETILIN ne’ebe fo nia vida timak ba nasaun doben ida ne’e ni independensia.

 Antes ne’e, mos Prezidenti partidu FRETILIN, Francisco Guterres ‘Lu-Olo’ rekomenda ba familia saudozu Nino Konis Santana atu antes entrega ruin ba estadu tenki liu uluk husi Partidu FRETILIN.

.

Kazu Porto Hera: “Lu-Olo Fiar Tribunal Sei Julga PM Xanana Gusmao”

.

Jornal Nacional Diario - Segunda, 15 Outubru 2012 

 Prezidenti partidu FRETILIN, Francisco Guterres Lu-Olo garante fiar katak, tempu ruma Tribunal sei halo julgamentu ba Primeiru Ministru (PM) Xanana Gusmao, tanba IV Governu Konstitusional ne’ebe lidera husi Xanana Gusmao la hare didiak kauza kontratu ho kompania internasional Lifes Enginering ba mega projetu porto temporariu komponente Naval nian iha Suku Hera, Distritu Dili. 

Mega projeitu ne’ebe tinan kotuk Governu deside fo single source ba kompania lifes Enginering husi Australia la iha kualidade no agora tohar tiha ona, maibe governu kontinua tau tan osan milaun 1.1 USD iha orsamentu retifikativu hodi selu projeitu ne’ebe laiha kualidade. 

Mega projeitu ne’e, inisiu tau orsamentu 4 USD, maibe tanba iha adisional osan ba projeitu ne’e nakfilak tiha ba milaun 7.5 USD. At liu tan, projeitu ne’e laiha kualidade mos Governu kontinua tau tan milaun 1.1 USD iha orsamentu retifikativu hodi selu kompania lifes Enginering. 

“Governu orsamenta tiha halo porto ida ne’e, depois la iha garantia tan no at tiha fali, Governu aumenta tan osan para hadia fila fali obra ne’ebe la iha kualidade, pior liu tan, iha kontratu la iha klauza ida para garantia katak, bainhira ponte ne’e at to’o iha tempu ida ne’e, kompania sira tenki haree nafatin, la’os mai para atu aumenta tan osa,” afirma Francisco Guterres Lu-Olo hodi rsponde JNDiario iha parlamentu Nasional, hafoin akompanha debate Orsamentu Retifikativu, Kinta (11/10). 

 Lu-Olo sublinha katak, governu tenki responsabliza ba failnasu ida ne’e, tanba governu maka la hare klauza kontra ho Lifes Engenering no la iha jestaun ida diak kona ba projeitu ne’ebe sira halo.

 “Hau hare governu la iha responsablidade ba kazu ida ne’e, tanba PM Xanana hare katak, lalika responsabliza ba ninia Governu no tenta atu taka deit ona,” Lu-Olo argumenta.

 Lu-Olo hatutan, loron ruma Tribunal mak sei julga fila fali kazu ne’e hodi responsabliza. “Hau repete fila fali katak, kualker dia Tribunal mak sei julga fila fali,” Lu-Olo afirma tan. 

Ba kestaun ne’e, antes nee mos, Xefi bancada FRETILIN, Aniceto Guterres liu husi deklarasaun politika iha PN, hato’o FRETILIN nia preokupasaun boot ba erru ne’ebe IV Governu halo iha kontratu ho Kompania Lifes Enginering.

.

"Taur, Lu-Olo, Alkatiri Diskuti Misaun UNMIT"

.

Jornal Timor Post - Kinta-feira, 13 Setembru 2012

Prezidenti Republika (PR) Taur Matan Ruak konvida lider Partidu istoriku FRETILIN, Francisco Guterres 'Lu-Olo' no Mari Alkatiri hodi deskute kona-ba Misaun Organizasaun Nasoens Unidas Integrasaun ba Timor-Leste (UNMIT) ne'ebe mak sei remata iha tinan ne'e nia rohan.

"Prezidenti da Republika konvida ami nain rua hanesan lider Partidu FRETILIN ne'ebe agora hanesan partidu opozisaun atu rona ami nia ideia kona-ba situasaun iha rai laran oinsa mak ita atu bele haree hamutuk kona ba ita nia rain, no ita nia distritu, relasiona ho mandatu misaun Nasoens Unidas," haktuir Prezidenti FRETILIN, Francisco Guterres 'Lu-Olo' ba Jornalista sira iha Palasiu Prezidenti Republika, KUarta (12/9).

Lu-Olo dehan, idea ne'ebe maka lider FRETILIN fo, liu-liu kona ba misaun kiik ne'ebe tuir planu sei kontinua iha Timor-Leste hafoin misaun UNMIT hotu, tuir Lu-Olo, misaun kiik ne'e hanesan politika atu haree ba prosesu justisa, dezenvolvimentu no voa Governasaun.

"Ami hanoin Timor Leste presiza nafatin misaun kiik oan ida, nune'e leno nafatin Timor Leste nia naran iha mundu internasional, maibe, Nasoens Unidas tenki sai duni," nia haklaken.

Relasiona ho situasaun estabilidade Timor Leste agora dadaun, lideransa partidu FRETILIN komenta katak, estadu iha instituisaun seguransa hanesan Polisia no forsa Militar ho governasaun dalimak nian, maibe importante misaun Unidas kiik ida kontinua iha Timor Leste para fo nafatin prezensa ne'ebe diak ba povu no lideransa tomak esforsu atu hadiak failansu ne'ebe sei iha.

"Ami nia prespetiva misaun kiik Nasoens Unidas kontinua mantein iha Timor Leste para fo kbiit nafatin ba ita para hakalma nafatin situasaun to'o ita iha konsiensia para ita nia nasaun la'o diak liu tan," Lu-Olo tenik.

.

Francisco Guterres 'Lu-Olo': "Prioridade Governu Labele Koalia De'it, Tenki Implementa"

.

Jornal Nacional Diario - Kinta-feira, 13 Setembru 2012

Prezidenti Partidu FRETILIN, Francisco Guterres 'Lu-Olo' hatete, programa prioridade Governu nian ne'e labele koalia deit maibe tenki implementa para bele hadia povu tomak nia moris.

"Programa sira ne'e koalia iha diskursu ne'e kapaas la halimar, ne'e ema hotu-hotu rona, atu halo redusaun ba ema kiak, atu halo infra-estrutura, atu halo buat oioin, ida ne'e ita koalia de'it ne'e furak la halimar, agora, importante maka ninia implementasaun ne'e atu la'o oinsa, mekanismu, meus saida maka ita uza para depois ita atu bele realiza buat sira ne'e hotu, ida ne'e maka importante," hateten Francisco Guterres Lu-Olo ba Jornalista sira Kuarta (12/9) iha Palacio Prezidenti Bairo-Pite, Dili, wainhira fo opiniaun kona ba programa kintu Governu konstitusional nian ne'ebe mak aprejenta ba Parlamentu nasional hodi halao diskusaun.

Tuir eis Prezidenti parlamentu Nasional ne'e mos dehan, Kintu Governu hasoru difikuldades boot teb-tebes, tanba ne'e FRETILIN duvida implementasaun programa Governu ne'ebe atu hatudu rejultadu ba povu nia moris diak.

"Hau pesoalmente haree katak, sira nia Governu iha difikuldades boot tebe-tebes, ita akompanhia took saida mak atu akontese," Haktuir Lu-Olo.

Lu-Olo mos hatutan tan katak, implementasaun Governu nian atu lao diak, i8mportante liu maka planu diak no programa diak, maibe importante mos tenki tau ema ne'ebe mak iha kapasidade hodi bele zere programa Governu ninian.

"Progresu atu realiza ho diak, se enkuantu planu ne'e diak i nia programa mos tenki diak, programa neé kuandu atu diak, neé so presizu tenki tau dispoin ema mos ho kapasidade para depois atu bele implementa programa ida ne'e, i depois meus sira ne'e hotu tenki tau tuir halo lolos, se ita tau ida keta-ketak, hau hanoin ne'e mos susar atu lao ba oin," afirma Lu-Olo.

.

"Eis Prezidenti PN 'Lu-Olo no La Sama' Fo Seminar Ba Membru Parlamentu Nasional"

.

Jornal Nacional Diario - Kuarta-feira, 12 Setembru 2012

Eis Prezidenti Parlamentu Nasional (PN) iha primeira Leguslatura, Francisco Guterres 'Lu-Olo' no eis Prejidenti II Lejislatura Fernando La sama de Araujo realiza seminar ida ba membru Parlamentu Nasional sira.

Objetivu husi seminar ne'e mak fahe esperensia ba membru deputado foun sira kona ba funsaun deputado ninian.

Primeiru Vice Prezidenti Parlamentu Nasional Adriano do Nascimento hateten, iha seminar ne'e eis Prezidenti parlamentu nasional nain rua ne'e koalia liu kona ba kompetencia Prezidenti PN no Kompetensia meza i iha asuntu seluk mos sira sei koalia kona ba mandatu, dever ho diretu deputadu nian.

"Ita hatene sira nain rua hanesan eis Prezidenti Parlamentu nasional, ne'e duni sira iha esperensia barak kona ba servisu PN," dehan Aderito ba Jornalista sira, Tersa (11/9) iha uma fukun PN.

Nia esplika, husi seminar ne'e mos bele loke deputadu foun sira nia hanoin kona ba lalaok servisu deputado nian, tanba iha deputado foun barak mak maioria seidauk hatene lolos funsaun deputado nian.

.

Inacio Moreira: "Veteranu 'Lu-Olo' La Hetan Projetu"

.

Jornal Timor Post - Tersa-feira, 11 Setembru 2012

Reprejetante Povu iha Uma Fukun Parlamentu Nasional (PN) hateten, projetu eletrisidade ne'ebe governu fahe ba veteranus sira durante ne'e laiha balansu, tanba Veteranus barak ne'ebe hamutuk ho Francisco Guterres Lu-Olo la hetan.

Assuntu ne'e fo sai husi Deputadu Inacio Moreira husi Bancada FRETILIN ba Jornalista sira iha Uma Fukun Parlamentu Nasional, Segunda (10/9).

"Husu ba Sua exlcensia, Kay-Rala xanana Gusmao, atu bele haree didiak, tanba veteranus ne'e ita tenki fo dignidade, liu husi projeitu ne'ebe fahe husi governu atu nune'e sira mos halo ho responsablidade no kualidade, maibe tuir ami nia haree, durante ne'e veteranu ne'ebe besik liu senhor Xanana maka hetan projeitu, maibe veteranus sira ne'ebe besik liu ho Lu-Olo se maka fo projeitu?" dehan Inacio Moreira.

Relasiona ho kestaun ne'e nia husu atu toma konsiderasaun hodi nune'e labele hamosu situasaun ida inbalansu.

"Problema ida ne'e ita tenki tetu, i hare!!!! nasaun ida ne'e ba ema hotu, halo desijaun ne'e tenki ho diak, atu nune'e labele iha deskonsiderasoens ba sira, ne'ebe ita hotu la hakarak, ida ne''e mak hau hanoin importante liu," nia hatutan tan.

Nia akresenta tan katak, Governu tenki hare kondisaun veteranu sira nian molok fo projetu no identifika kompania sira ne'e, veteranus tebes ka lae.

"Ema ida la bele mai dehan deit nia ne'e veteranus, tanba deit hakarak atu hetan projeitu, maibe ninia kondisaun ne'e laiha, ida ne'e mak hau hakarak ita tenki koalia ba malu para atu bele kumprende malu, hau hateten iha maneiras lubuk ida, ne'ebe presija uza hodi fo projetu ba ita nia veteranus sira atu halo, hau hakarak hateten ba kompania hotu-hotu ne'ebe dehan kompania ne'e veteranus ninian, ita tenki hare katak ema hirak ne'e tebes veteranu ka lae," nia kestiaona.
.