Kazu ConocoPhilips Vs Estado TL; “Rejistu Ona Iha Tribunal”

.

Jornal Nacional Diario - Kinta-feira, 18 Outubru 2012 

Kazu kompania Internasional ConocoPhilips-Woodside kontra Estado Timor Leste (TL) hatama ona iha Tribunal Distrital Dili (TDD) no hein de’it ona Prosesu julgamentu. 

 Ofisial Justisa iha TDD, Kuarta (17/10) informa ba JON Diario katak, kazu ConocoPhilips entre estado Timor Leste ne’e, la’os kazu ida de’it, maibe kazu hamutuk 28 mak kompania esplorasaun mina tasi Timor halo hasoru estado TL. Kona ba bainhira mak halo julgamentu no advogado husi kompania ConocoPhilips ne’e rasik ofisial justisa ne’e informa detalhadu, tanba, ne’e sei prosesu nia laran. 

Kazu hamutuk 28 ne’e ho nia numeru prosesu mak hanesan, prosesu 70/civil/2011/RDD, 71/civil/2011 TDD aitor mak kompania Tolyo Timor Sea Recourse PTY.Ltd hasoru estado Timor Leste, prosesu 72/civil/2011/TDD, 73/civil/2011/TDD, 74/civil/2011/TDD, 74/civil/2011/TDD, 75/civil/2011/TDD, 76/civil/2011/TDD, 77/vicil/2011/TDD, 78/civil/2011/TDD, 79/civil/2011/TDD, 80/civil/2011/TDD, 81/civil/2011/TDD, 82/civil/2011/TDD, 83/civil/2011/TDD, autor husi ConocoPhilips hasoru estadu, prosesu 109/civil/2011/TDD, 110/civil/2011/TDD, autor husi kompania prosafe rigs ltd hasoru estadu TL. Prosesu 02/civil/2012/TDD kompania minimiza Limited hasoru estadu, prosesu 16/civil/2012/TDD, 17/civil/2012/TDD, 18/civil/2012/TDD autor husi kompania ConocoPhilips hasoru estadu TL, prosesu 39/civil/2012/TDD, 40/civil/2012/TDD, 41/civil/2012/TDD, 42/civil/2012/TDD, 43/civil/2012/TDD, 44/civil/2012/TDD autor mak ConocoPhilips hasoru estado Timor Leste, prosesu 65/civil2012/TDD autor mak Kompania sanros JPDA hasoru estado Timor Leste no ikus liu mak prosesu 86/civil/2012/TDD autor mak kompania Santos Limite hasoru estado Timor Leste. 

Problema entre kompania ConocoPhilips ho estado Timor Leste ne’e, tanba kompania la satisfas ho estado Timor Leste ne’ebe mak la selu impostu 50% ba kofre estado nian. 

.

Kontra Conoco Philips “PM Propoin U$ 1.500.000 Selu Advogado Internasional”

.

Jornal Timor Post - Kuarta-feira, 17 Outubru 2012 

Primeiru Ministru husu ba Ministra Financas atu foti osan husi fundus kontijensia ho montante U$ 1.500.000,00 (um pontu sinco milaun Dollar Amerikanu) hodi selu advogadu internasional atu defende interese povo no nasaun iha area mina. 

 Proposta ne’e propoin iha debate espesialidade ba orsamentu retifikativu, Tersa (16/10) iha uma fukun parlamentu Nasional. 

 Durante diskusaun mosu preokupasaun husi Bancada Opozisaun Frente Revolusionariu Timor-Leste Independente (FRETILIN), deputadu Antoninho Bianco tanba la preve iha orsamentu retifikativu sekretaria PM nian. 

 “Teki-teki mosu numeru osan ne’ebe boot, tuir lolos iha pedidu ne’e 500.000 mil ba iha sekretariu Primeiru Ministru nian iha orsamentu retifikativu, hau husu ida ne’e laos atu redus, mais sa’e fali ba 1 mialun 500 mill ne’e hau hanoin katak, keta tekniku sira mak aumenta karik,” Antoninho Bianco kestiaona.

 Hatan ba preokupasaun ne’e, Primeiru Ministru Kay Rala Xanana Gusmao hatan, Primeiru Ministru iha kbiit atu halo transferensia pursentu 20. 

 “Um milaun e quinentus ne’ebe mak la mai iha retifikativu ninian ne’e tradus duni iha taxa ezekusaun nian, hau rasik mak husu 1 milaun de quinhentus ne’e atu selu advogado ne’ebe atu mai defende ita nia mina,” esplika Kay Rala xanana Gusmao iha uma fukun PN.

 Nia afirma, presiza dudu prosesu ne’e ba oin, maske osan ne’e hodi selu advogado, maibe rekooperasaun sei boot liu fali, tanba minimu um billaun seis sentos miloens no maximu tres billoens. PM xanana mos akresenta tan katak, advogado ne’ebe foti husi liur, laos kestaun tanba la konfia rai laran, maibe tanba problema ne’e kompleksu tebe-tebes. 

Nia mos hatutan, Advogado husi Amerika ne’e sei defende interese Timor iha area mina ho esperensia boot iha kazu impostu. Hafoin hetan esklaresementu deputadu proponente Antoninho Bianco retira hikas proposta, tanba hetan esklaresementu husi PM Xanana Gusmao.

.

La Konfia Advogadu Timor Oan; “PM Xanana Gusmao Hili Aren Foks Husi Amerika”

.

Jornal Nacional Diario - Kuarta-feira, 17 Outubru 2012 

 Primeiru Ministru (PM) Kay Rala Xanana Gusmao hateten katak, Governu la iha konfiansa ba advogado Timor oan hodi defende Governu iha Tribunal, nune’e hili advogado internasional (Amerika-red), Aren Foks ne’ebe esperensia maka’as ba asuntu petroliu no Gas nian. 

 Problema ne’ebe iha, PM Xanana dehan, tamba kompania Conocophilips seidauk selu taxa ba estadu Timor Leste ho total osan U$ 3 billoens, tanba ne’e autoridade Conocophilips la satisfeitu hodi hatama Governu ba PGR ho kazu hamutuk 28. 

 “Ami hili Aren Foks, tanba haree tuir advogadu sira iha mundu, Aren Foks ne’e senadu iha Washintong, Amerika ne’ebe iha mos esperensia kona ba problema sira relasionadu taxa kontratu petroliu,” esplika PM Xanana Gusmao iha Parlamentu Nasional, Tersa (16/10), hodi responde perguntas Deputadu Bancada FRETILIN, Francisco Branco ne’ebe husu kona-ba numeru atu selu advogadu internasional oinsa. 

PM Xanana dehan tan katak, Governu kontratu Advogadu Aren Foks ne’e atu defende mos interese ba nasaun ne’e nian, tanba nia dehan, kazu ne’e laos fasil. 

 “Fofoun Aren Foks tau kazu lima kona ba selu ne’e oinsa, no fim bainhira ita book ba book mai sira hare ita Timor Leste sira hanoin katak, ita la dun iha,” haklaken PM Xanana Gusmao.

 Ho Volume servisu sira ne’e, PM Xanana optimista katak, Governu Timor Leste ne’ebe Aren Foks mak atu defende ne’e sei manan Conocophilips iha Tribunal. 

.

Estanislau da Silva: “Governu Bele Kontratu Advogadu Amerika Maibe Tenki Konsidera Advogadu Timor Oan”

.

Jornal Nacional Diario - Kinta-feira, 11 Outubru 2012 

Deputadu Bancada FRETILIN iha uma fukun Parlamentu Nasional, Estanislau da silva, hatan ba kestaun pozisaun Governu atu selu advogadu husi Amerika atu defende interese Estadu Timor Leste, nia hateten, iha dalan atu ba husu advogadu husi rai liur maibe, tenki mos konsidera advogadu Timor oan tanba sira mak hatene nia kondisaun real kona ba lei nian iha Timor Leste. 

 Tanba bainhira iha kolaborasaun entre parte rua ne’e, bele defende estadu Timor Leste nia interese ho diak liu, realidade Prokuradoria Jeral da Republika Ana Pessoa mos uluk salva ona osan balun husi kompania, bainhira hala’o intervensaun. 

Hanesan Reprejenta povu Estanislau da Silva konkorda ho Politika governu nia kontratu advogado internasional, tanba tuir nia politika ne’e bele intensivu liu iha antendementu kazu bas a advogadu Timor oan hetan apoiu husi advogadu internasional e aproveita oportunidade transfere hela matenek. 

“Tratamentu kazu mak tenki haree didiak, tuir duni kompetensia juridiku,” Estanislau da Silva rekomenda. Antes ne’e, Procurador Geral da Republika Ana Pessoa Pinto, hateten katak, Advogado Amerikanu ida ne’ebe maka oras ne’e governu TL hasoru Conocophilips iha Tribunal, ne’e dezastre tebes tanba advogado Amerimanu ne’e la hatene lei Timor Leste.

 Iha sorin seluk, parte konfirmadu hateten katak Governu lakon konfiansa ba advogadu Timor oan tanba durante ne’e iha pratika advogadu Timor oan maioria mak defende liu interese kompania nia duque estadu Timor Leste ho povu Timor Leste nia interese. 

 “Faktu kona ba kazu rai nian, ita nia advogadu sira ne’e defende liu ema estranjeirus maka’as liu duque nia maluk kulit metan,” fontes ne’e kestiaona. Ba kestaun ne’e.

 Antes ne’e, Primeiru Ministru Kay Rala Xanana Gusmao hateten katak, nia sei ba hatan iha Tribunal kona ba keixa 28 ne’ebe maka husi Conocophilips hato’o tiha ona ba PGR. Kompania Conocophilips husi Amerika ne’ebe exprora mina rai iha Tasi Timor ne’e, PM Xanana koalia katak, sira la selu tiha ona taxa ba estadu hamutuk US$3 biloens, nune’e halo kompania refere la satisfeitu hodi hatama keixa ba PGR.

.

Conocophilips VS Estado TL; “Governu Tenke Trata Ho Kolketivu”

.

Jornal Nacional Diario - Kinta-feira, 11 Outubru 2012 

Governu ne’ebe lidera husi Promeiru Ministru (PM) Xanana Gusmao, tenke trata ho kolektivu ba problema entre estado Timor Leste ho kompania esplorasaun mina Timor Conocophilips husi Amerika. 

Director Judisial System Monitoring Program (JSMP) Luis Oliveira Sampaio husu ba Governu atu trata kazu ne’e ho kolektivu, iha kordenasaun entre Governu, Prokuradoria Geral da Republika (PGR) no mos Presidenti da Republika. 

JSMP konsidera kazu ho Conocophilips ne’e boot tebes, ne’e duni Ministeriu Publiku (MP) maka hamrik reprejenta estado nian naran hodi defende interese estado hodi hasoru kompania ka individu ruma ne’ebe maka kondena estado Timor Leste.

 “Kazu ne’e liga ho interese estado nian no estado mak tenke responde, ne’e duni mak hau dehan tenki trata ho kolektivu atu labele failha iha dalan klaran,” esplika Luis Sampaio ba JNDiario iha nia knar fatin, Colmera, Dili, Kuarta (10/10). 

Nia dehan, Estadu TL tenki iha desizaun hamutuk ho ida de’it, tanba kazu ne’e Estado tenki defende soberania nasaun nian. Rajaun Conocophilips dada estado ba tribunal, tanba Estado Timor Leste la selu 50% ba kofre Estado tuir akordu ne’ebe mak estado Timor Leste ho kompania halo, maibe tuir Luis Samapaio, lolos ne’e kompania internasional labele dada problema ne’e to’o Tribunal, tanba iha kualker akordu hotu-hotu iha kauza ida ikus ne’e rezolusaun konflitu. 

Iha ne’eba defini, kuandu iha parte rua ne’e mosu desputa ka konflitu sira iha dalan atu halo negosiasaun ka tentative rekonsiliasaun. Hatan kona ba pozisaun governu nian atu selu advogado husi Amerika hodi defende interese estadu Timor Leste nian iha Tribunal, Director JSMP Luis Oliveira Sampaio dehan, advogado rai liur sira seidauk kumpriende lei iha nasaun Timor no seidauk hatene sistema justisa iha Timor. 

Ne’e duni se advogado rai liur atu mai kaer kazu iha Timor ne’e presiza tempu atu estuda, tanba ne’e estado Timor Leste tenki kontratu mos ho advogado Timor oan hodi nune’e advogado internacional no nacional ne’e bele serviso hamutuk.

 “Advogado rai liur mesmu nia professional ona iha nia nasaun, maibe nia seidauk kumpriende ita nia lei iha Timor, ne’e duni bainhira sira mai atu kaer kazu ne’e sira mos presiza tempu atu estuda fali ita nia lei ne’e no ita nia sistema justisa,” esplika Luis Sampaio. 

.